Ժիրայր Սեֆիլյանի եւ մյուսների գործով արդեն մեկ տարուց ավելի կալանքի տակ գտնվող Ներսես Պողոսյանը հոկտեմբերի 22-ին դադարեցրել է սեպտեմբերի 29-ին սկսած անժամկետ հացադուլը: Այս մասին այսօր՝ հոկտեմբերի 23-ին, NEWS.am-ի հետ զրույցում ասաց նրա շահերի պաշտպան Նինա Կարապետյանցը: Նա նշեց, որ Ներսես Պողոսյանը 24 օր տեւած հացադուլից հետո շատ հյուծված է եւ տկար, փաստաբան Արայիկ Պապիկյանին՝ նրան այցելության ժամանակ հաջողվել է համոզել, որպեսզի դադարեցնի հացադուլը:
«Նա դադարեցնելուց հետո հրաժարվել է բուժօգնությունից, բայց հուսանք, որ թույլ կտա, որպեսզի հետազոտեն, համապատասխան սննդակարգ նշանակեն: Նրա մոտ հացադուլից հետո առողջական խնդիրներ են ի հայտ եկել՝ սրտի, լյարդի, արյան ճնշման,երիկամների հետ կապված»
Ներսես Պողոսյանը հացադուլով պահանջում էր Ժիրայր Սեֆիլյանի եւ մյուսների գործով դատավարության լիարժեք հրապարակայնություն, իրեն վիրավորած դատախազ Պետրոս Պետրոսյանի բացարկ եւ իր խափանման միջոց կալանքի փոփոխում:
Ներսես Պողոսյանն անժամկետ հացադուլ է սկսել Երեւանի Շենգավիթ վարչական շրջանի դատարանում տեղի ունեցած նիստից անմիջապես հետո: Նա հացադուլ սկսելու մասին հայտարարել է այն բանից հետո, երբ դատարանը մերժել է նրա խափանման միջոց կալանքը փոխելու վերաբերյալ իր պաշտպանի միջնորդությունը:
Հիշեցնենք, որ Ներսես Պողոսյանը կալանավորվել է 2016 թվականի մայիսի 31-ին: Նրան մեղադրում են ՀՀ Քրեական օրենսգրքի 235 հոդվածի 2-րդ մասով` Ժիրայր Սեֆիլյանի հետ համագործակցության արդյունքում ապօրինի զենք եւ զինամթերք պահելու մեջ: Այս քրեական գործով նախաքննություն ավարտվել է, գործն ուղարկվել է դատարան: