Թումո ստեղծարար տեխնոլոգիաների կենտրոնում հոկտեմբերի 20-21-ին կայացավ Beeline Հայաստանի եւ Մայքրոսոֆթ ինովացիոն կենտրոն Հայաստանի կողմից կազմակերպված «Հեքըթոն» նորարար գաղափարների եւ ծրագրավորման մրցույթը:
Հաղթող ճանաչվեց Lezoo թիմը, որը արժանացավ 3000 դոլարին համարժեք գումարի չափով մրցանակի: Թիմը մշակել է մի լուծում, որը թույլ էր տալիս ոչ միայն խմբակային զանգ կատարել, այլեւ խոսակցության ընթացքում ունենալ համաժամանակյա թարգմանություն։
Երկրորդ տեղի մրցանակին արժանացան երկու թիմեր՝ iterate եւ megista, որոնք կստանան 1000-ական ԱՄՆ դոլարին համարժեք գումարի չափով մրցանակ։ Iterate թիմի մշակած լուծումը թույլ է տալիս հեռահաղորդակցության կապից օգտվողին տեսահոլովակներ նայելու միջոցով հավաքել միավորներ եւ հետագայում այդ միավորները փոխանակել հեռախոսակապի րոպեների հետ։ Իսկ Megista թիմի մշակած պրոդուկտը թույլ է տալիս հաճախորդի ունեցած տվյալների վերլուծության հիման վրա առաջարկել նրան տվյալ օպերատորի առաջարկած ամենալավ սակագնային պլանը։
«Թիմերը մեծ աշխատանք են կատարել այս 24 ժամվա ընթացքում եւ ներկայացրել են իսկապես օգտակար եւ հետաքրքիր լուծումներ։ Կարծում եմ, մեր հեքըթոնը կարելի է համարել կայացած։ Շնորհակալ եմ բոլոր մասնակիցներին հեռահաղորդակցության ոլորտի նկատմամբ հետաքրքրություն ցուցաբերելու համար։ Դա այն ոլորտն է, որը 21-րդ դարում վերաբերում է գրեթե ամեն մեկին, հետեւաբար դրա զարգացումը կենսական նշանակություն ունի բոլորիս համար։ Իսկ այսպիսի նորարար եւ հետաքրքիր լուծումները կարող են շատերի կյանքը դարձնել ավելի լավը», - նշեց Հայաստանում Beeline-ի գլխավոր տնօրեն Անդրեյ Պյատախինը:
«Հեռահաղորդակցության հեքըթոնին մասնակցող թիմերը բազմաթիվ հետաքրքիր լուծումներ էին մշակել՝ կիրառելով նորագույն տեխնոլոգիաներ եւ հիմնվելով այս ոլոտում առկա big data-ի վրա։ Լուծումներից շատերը հետագայում կարող են դառնալ բավականին նորարար եւ եկատմաբեր պրոդուկտներ, որոնք կիրառելի կլինեն հեռահաղորդակցության օպերատորների կողմից ցանկացած երկրում», - նշում է Մայքրոսոֆթ ինովացիոն կենտրոնի տնօրեն Արտաշես Վարդանյանը։
Դիմում-հայտ ներկայացրած 40-ից ավել թիմերից ընտրվել էին 25-ը, որոնք մրցույթի 24 ժամվա ընթացքում մշակեցին հեռահաղորդակցության ոլորտին վերաբերող տարբեր լուծումների փորձնական տարբերակներ եւ ներկայացրեցին մասնագետների դատին։ Մրցույթի որպես ընտրության չափանիշ կիրառել է 24 ժամում կատարված աշխատանքի ծավալը, գաղափարի նորարարությունը եւ կիրառելիությունը։
