Ապրիլյան պատերազմը մեծ հարված հասցրեց Արցախի հակամարտության կարգավորման բանակցությունների ընթացքին, Ադրբեջանը տորպեդահարեց բանակցությունները: Այս մասին այսօր՝ հոկտեմբերի 23-ին, Արցախի պետական համալսարանում ուսանողների հետ հանդիպման ժամանակ նշեց Հայաստանի ԱԺ ՀՀԿ խմբակցության պատգամավոր Կարեն Բեքարյանը:
Նրա խոսքով՝ այժմ թիվ մեկ խնդիր է դառնում սահմանային իրավիճակը հասցնել զինադադարի մակարդակի. «Վիեննայում եւ Սանկտ Պետերբուրգում ձեռք բերված պայմանավորվածություններով հենց նպատակ կար թուլացնել լարվածությունը, բայց այս պայմանավորվածություններից Ադրբեջանն անուղղակիորեն հրաժարվում է, հետեւաբար պայմանավորվածությունները տեղից չեն շարժվում»:
Անդրադառնալով շփման գծում հետաքննության մեխանիզմների ներդրմանը՝ Բեքարյանը նշեց, որ հայկական կողմն ապացուցողական բազայի կարիք ունի, նաեւ ԵԱՀԿ նախագահի անձնական ներկայացուցիչ Անջեյ Կասպրշիկի գրասենյակի ընդլայնումն է կարեւոր. «Օրինակ՝ հրադադարի խախտման դեպք է գրանցվում, հետաքննության մեխանիզմներն արձանագրում են դա, ինչից հետո դաշտային օգնականները կարող են գնալ այնտեղ եւ թույլ չտալ շարունակություն: Ամբողջ նպատակն ապացույցների պատկեր ունենալն է: Եթե հետաքննության մեխանիզմներ ներդրվեն, հետագայում հնարավոր է Ադրբեջանին որոշակի պատասխանատվության ենթարկել, բայց սրա մասին այժմ խոսելը շատ վաղ է, որովհետեւ Ադրբեջանը հրաժարվում է մեխանիզմների ներդրումից»:
Ինչ վերաբերում է հայ-ադրբեջանական սահմանին եւ շփման գծում առկա իրավիճակին, ապա ՀՀԿ-ական պատգամավորը նկատեց, որ այն բավարար գնահատել չի կարելի. «Ժամանակ առ ժամանակ հանդարտեցման փուլեր լինում են, սակայն լիակատար կայունացման մասին չենք կարող խոսել»:
Նա նշեց նաեւ, որ Ադրբեջանում հայատյացության դրսեւորումներ շատ կան եւ նրանց մամուլի ռադիկալությունը չենք կարող համեմատել Հայաստանի մամուլի հետ. «Այլախոհությունն Ադրբեջանում վերացված է, ազատ մամուլ չկա, հետեւաբար՝ այնտեղ տիրող իրավիճակի մասին օբյեկտիվ տեղեկատվություն հնարավոր չէ ստանալ»:
