2017 թվականի երեք քառորդը հետընտրական ժամանակահատված էր, եւ այս ժամանակահատվածում երկրում հասարակական-քաղաքական լարված իրավիճակ գործնականում չի եղել: Հոկտեմբերի 23-ին լրագրողների հետ հանդիպման ժամանակ այսպիսի կարծիք հայտնեց Խոսքի ազատության կոմիտեի նախագահ Աշոտ Մելիքյանը:
Փորձագետի խոսքով՝ նույնիսկ այսպիսի պայմաններում լրագրողների նկատմամբ բռնության դեպքեր գրանցվել են:
«Եղել է բռնության կիրառման 2 դեպք, տարբեր կարգի ճնշման 16 դեպք եւ տեղեկատվություն ստանալու ու տարածելու իրավունքների խախտման 39 դեպք»,- պարզաբանեց Մելիքյանը՝ հավելելով, սակայն, որ այս խախտումների ընդհանուր թիվը նախորդ քառորդի համեմատությամբ կրճատվել է 72-ից մինչեւ 57:
Փորձագետը միաժամանակ նշեց, որ որոշ միտումներ մտահոգության տեղիք են տալիս: Այսպես՝ լրատվամիջոցների եւ լրագրողների նկատմամբ ճնշում կիրառելու փաստերի թվի կրճատման հետ մեկտեղ, աճել է տեղեկատվություն ստանալու եւ տարածելու իրավունքի խախտումների թիվը:
«Եթե անցած քառորդում գրանցվել է տեղեկատվություն ստանալու եւ տարածելու իրավունքի խախտման 10 դեպք, ապա այս տարի՝ արդեն 39»,- շեշտեց Մելիքյանը՝ հավելելով, որ շարունակում է մտահոգություն հարուցել լրագրողների նկատմամբ ճնշման եւ բռնության առկայության փաստն ինքնին՝ անկախ դրանց թվից: