2015 թվականի հունիսին Բաղրամյանի պողոտայում Electric Yerevan բողոքի ակցիայի օրը, ինչպես նաեւ 2016-ի հուլիսի վերջին Խորենացի փողոցում եւ «Սարի թաղ» թաղամասում ոստիկանության աշխատակիցների կողմից լրագրողների նկատմամբ զանգվածային բռնության կիրառման վերաբերյալ գործերով քննչական գործողությունները անարդյունք եւ ձեւական են կատարվում: Հոկտեմբերի 23-ին լրագրողների հետ հանդիպման ժամանակ այսպիսի կարծիք հայտնեց Խոսքի ազատության կոմիտեի նախագահ Աշոտ Մելիքյանը:
Նրա խոսքով՝ Խոսքի ազատության կոմիտեն արձանագրել է, որ վերջին շրջանում 2 գործով էլ նոր մեղադրվողներ կամ կասկածյալներ երեւան չեն բերվել:
«Ընդհանուր առմամբ, վերջին 2 տարում Electric Yerevan-ի գործով մեղադրանք է առաջադրվել 4 անձանց նկատմամբ: Միեւնույն ժամանակ, Խորենացի փողոցում եւ «Սարի թաղ» թաղամասում տեղի ունեցած իրադարձությունների գործով ավելի քան 1 տարում քննչական գործողություններ, մեղադրանքներ են ներկայացվել 9 անձանց»,- պարզաբանեց փորձագետը՝ հավելելով, որ տեսախցիկների հոլովակներում երեւում է, թե ինչպես են տասնյակ ոստիկաններ եւ նրանց աջակցող քաղաքացիական հագուստով բազմաթիվ անձինք բռնություն կիրառում եւ հետապնդում լրատվամիջոցների աշխատակիցներին:
