Բաղդադի սկզբունքային դիրքորոշումն է Սիրիային Արաբական երկրների լիգա վերադարձնելը: Այս մասին Իրաքի ԱԳ նախարար Իբրահիմ ալ Ջաֆարին հայտարարել է ՌԴ ԱԳ նախարար Սերգեյ Լավրովի հետ բանակցությունների արդյունքներով, փոխանցում է ՏԱՍՍ-ը:
«Այս հարցում մենք ռազմավարական դիրքորոշում ունենք, մենք այս մասին բազմիցս ենք ասել,- շեշտել է Իրաքի ԱԳ նախարարը: - Մենք կարծում ենք, որ անհրաժեշտ է հարգել Սիրիայի ինքնիշխանությունը եւ Սիրիային վերադարձնել Արաբական երկրների լիգա»:
«Ինչ վերաբերում է Սիրիայի բոլոր քաղաքական հարցերին, ապա դրանք պետք է լուծեն իրենք սիրիացիները»,- նշել է նախարարը:
«Մենք կարծում ենք, որ Սիրիայում պատերազմի 5 տարին եւ մյուս երկրների միջամտությունը միայն սպանությունների են հանգեցրել, երեխաների ու կանանց տառապանքի, տների ու փողոցների կործանման,- արձանագրել է ալ Ջաֆարին: - Այս պատճառով կարծում ենք, որ հարկավոր է սիրիացիներին հանգիստ թողնել, նրանց իրենց ճակատագիրն ինքնուրույն որոշելու հնարավորություն տալ: Այո, հնարավոր է, լինեն այս կամ այն հակասությունները, սակայն խնդիրները պետք է լուծվեն հենց այս միջոցով»:
