Որոշ լրագրողների՝ իրենց իրավունքների համար պայքարելու ցանկության բացակայությունը ստիպում է կասեցնել որոշ անձանց դեմ սկսված գործերը, որոնք այս կամ այն կերպով խոչընդոտել են լրատվամիջոցների աշխատանքին: Հոկտեմբերի 23-ին լրագրողների հետ հանդիպման ժամանակ այս մասին ասաց Խոսքի ազատության կոմիտեի նախագահ Աշոտ Մելիքյանը:
Նրա խոսքով՝ եթե լրագրողը չի ցանկանում իրավապահ մարմինների հետ համագործակցել, ապա նրան ոչ մի բանով օգնել չի կարելի:
«Լրագրողներ կան, որոնք իրենց իրավունքնների համար պայքարում են, սակայն կան եւ այնպիսիները, որոնք, ենթադրում եմ, պայմանավորվում են եւ իրենց պայքարը դադարեցնում: Այս դեպքում ո՛չ մենք, ո՛չ իրավապահ մարմիններն այնտեղ անելիք չունենք»,- պարզաբանեց Մելիքյանը:
Փորձագետը նշեց, որ իր պրակտիկայում դեպքեր են եղել, երբ գործը հասել է ՄԻԵԴ եւ փաստացի ավարտական փուլում է եղել, երբ հանկարծ տուժած լրագրողները հայտարարել են, որ չեն ցանկանում պայքարը շարունակել: