Երեւանի Աջափնյակ եւ Դավիթաշեն վարչական շրջանների ընդհանուր իրավասության դատարանում այսօր՝ հոկտեմբերի 23-ին, փորձագետ Կարեն Վարդանյանի սպանության գործով նիստին մեղադրողը ամբաստանյալների համար ցմահ ազատազրկում է պահանջել: NEWS.am-ի հետ զրույցում ամբաստանյալներից Արթուր Միհրանյանի շահերի պաշտպան Մարինե Ֆարմանյանը նշեց, որ իր պաշտպանյալը եւ մյուս ամբաստանյալ Գեւորգ Զոհրաբյանը մեղադրյալի այս պահանջին որեւէ կերպ չեն արձագանքել, հանրային պաշտպանը նշեց, որ մեղադրողի ճառին պաշտպանական կողմը կարձագանքի հաջորդ դատական նիստին՝ պաշտպանական ճառով, հիմնավորումներով:
Նշենք, որ ամբաստանյալներից Արթուր Միհրանյանը ցուցմունք տալու ժամանակ հայտարարել էր, թե Կարեն Վարդանյանին ինքն է սպանել եւ ամբողջ մեղքն ընդունել էր: Գեւորգ Զոհրաբյանն իր ցուցմունքում եւս ասել էր, որ փորձագետի սպանության հետ որեւիցե կապ չունի, բացի այն, որ թաքցրել է կատարվածը:
Հիշեցնենք, որ ըստ մեղադրական եզրակացության` փորձագետ Կարեն Վարդանյանի սպանությունը տեղի է ունեցել 2016 թ. մարտի 17-ին: Նախնական քննությամբ ձեռք բերված բավարար ապացույցների համաձայն՝ Սեւանի Ախթամար թերակղզու մոտ Գեւորգ Զոհրաբյանը եւ Արթուր Միհրանյանը քարի բազմաթիվ հարվածներ էին հասցրել Կարեն Վարդանյանի գլխին։ Այնուհետեւ տեսնելով նրա անշնչացած մարմինը եւ հասկանալով, որ արդեն մահացել է՝ նրա դիակը ավտոմեքենայով տեղափոխել են Երեւան եւ թաղել Գեւորգ Զոհրաբյանին պատկանող ավտոտնակում։
Նրանց մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ եւ 8-րդ կետերով (սպանություն կազմակերպված խմբի կողմից շահադիտական դրդումներով): Նրանց նկատմամբ որպես խափանման միջոց է ընտրվել կալանավորումը։ Ամբաստանյալներն իրենց առաջադրված մեղադրանքը չեն ընդունել:
