Ժնեւում Հայաստանի եւ Ադրբեջանի նախագահների վերջին հանդիպումից դեռ մեկ շաբաթ էլ չի անցել, իսկ Բաքուն կրկին սադրանքի է դիմում: Ադրբեջանի զինուժն Արցախի հետ շփման գծում նորից խախտել է հրադադարի ռեժիմը: Հոկտեմբերի 22-ին հակառակորդը Մարտակերտ-Մատաղիս ուղղությամբ «ՍՊԱՅԿ» տիպի հակատանկային հրթիռ է կիրառել, նաեւ ականանետի 5 արկ է արձակել: Եվս մեկ «ՍՊԱՅԿ» էլ ադրբեջանական զինուժը կիրառել է այսօր ժամը 15-ի սահմաններում:
Արցախի ՊՆ-ն հայտարարել է, որ Բաքուն ոչ միայն հակված չէ նախագահների ձեռք բերած համաձայնությունը նպատակաուղղել հակամարտության խաղաղ կարգավորմանն ու չարդարացված կորուստների բացառմանը, այլ հակառակը, կանխամտածված սադրանքների միջոցով ապակայունացնում է իրադրությունը: Արցախյան զինված ուժերը ձեռնպահ են մնացել պատասխան գործողություններից: ՊՆ-ն, սակայն, զգուշացրել է. սադրանքները շարունակվելու դեպքում պատասխանը լինելու է անհամարժեք եւ բավական ցավոտ:
Արցախում պաշտպանության բանակի երկու զինծառայող է զոհվել: Նախապես հաղորդվել էր, որ ժամկետային Արամ Խաչատրյանն ու Հրաչ Ավետիսյանը մահացու հրազենային վիրավորում են ստացել զենքի օգտագործման կանոնների խախտման հետեւանքով:
Հետո արդեն քննչական կոմիտեն տեղեկացրեց, որ 19-ամյա Արամ Խաչատրյանը սպանվել է: Աջ ուսագոտու շրջանում հրազենային վիրավորում ստացած զինծառայողը հոսպիտալ տեղափոխվելու ճանապարհին մահացել է: Նրա մահվան գործով ձերբակալված կա. նա նույն զորամասի ժամկետային զինծառայող է, կրտսեր սերժանտ: Արամը Վայոց ձորի Ռինդ գյուղից էր, 9 ամիս անց զորացրվելու էր: Նա ընտանիքի կրտսեր զավակն էր, մեկ եղբայր ունի:
Մյուս զինծառայողը՝ Հրաչ Ավետիսյանը, հրազենային վնասվածք է ստացել գլխի շրջանում: Քննությամբ պարզվել է, որ նա իրեն ամրակցված ԱԿ-74 տեսակի ինքնաձիգից արձակած կրակոցով ինքնասպանություն է գործել: Պարզվել է նաեւ, որ դեպքից օրեր առաջ Հրաչ Ավետիսյանի հետ վիճաբանել եւ նրա նկատմամբ բռնություն է կիրառել զորամասի մեկ այլ զինծառայող: Նա ձերբակալվել է: 18-ամյա Հրաչը Երեւանից էր, 3 ամիս առաջ էր զորակոչվել: Նա ծառայության էր մեկնել կրտսեր եղբոր հետ, նույն զորամասում էին ծառայում: Ավետիսյանների ազգականը պատմել է, որ Հրաչը սրտի հետ կապված խնդիրներ է ունեցել, ծնողները պայքարել են, որ նրան բանակ չտանեն, բայց անօգուտ: Վերջերս էլ նրա առողջական վիճակը վատացել էր, երկու օրից նրան պետք է Երեւան տեղափոխեին՝ Կենտրոնական զինվորական հոսպիտալ:
Եվս մեկ ժամկետային զինծառայող այսօր առավոտյան ավտովթարի զոհ է դարձել: 19-ամյա Գեւորգ Խանամիրյանը վթարի է ենթարկվել Ագարակաձոր-Գնիշիկ ավտոճանապարհին: Երիտասարդն «ՈՒԱԶ» մակնիշի մեքենայով ձորն է ընկել: Մեքենան, սակայն, պաշտպանության նախարարությանը չի պատկանում: Մահացած զինծառայողն արձակուրդում է եղել:
Ազգային ժողովի պաշտպանության հարցերի հանձնաժողովում այսօր քննարկվել են մեծ աղմուկ բարձրացրած «Պաշտպանության մասին» օրինագիծն ու «Զինվորական ծառայության եւ զինծառայողի կարգավիճակի մասին» օրենքում փոփոխությունների նախագիծը: Պաշտպանության նախարարության նախաձեռնած փոփոխությունները վերաբերում են ակադեմիական տարկետման տրամադրման կարգին, որի համաձայն՝ ակադեմիական տարկետում կտրամադրվի միայն ՊՆ-ի հետ պայմանագիր կնքող ուսանողներին։ Զինվորական ծառայությունից տարկետման իրավունք կստանան նաեւ լավագույն մարզիկները, որոնք պարբերաբար պետք է կրկնեն միջազգային մրցաշարերում գրանցած արդյունքները: Վիգեն Սարգսյանը կատակել է. այդպիսով մեր մարզիկները շահագրգռված կլինեն ավելի բարձր ցատկել եւ ավելի լավ վազել:
Նշենք, որ օրերս մի խումբ ուսանողներ բողոքի ակցիա էին անցկացրել կրթության նախարարության շենքի առջեւ, իսկ հետո բաց նամակ հղել կրթության եւ պաշտպանության նախարարներին՝ իրենց անհամաձայնությունը հայտնելով փոփոխությունների կապակցությամբ: Կրթության նախարար Լեւոն Մկրտչյանը, սակայն, կարծում է, որ ակադեմիական տարկետումը շատ դեպքերում ընդամենը զինծառայությունից խուսափելու միջոց է դառնում:
Սամվել Բաբայանի եւ մյուսների գործով այսօրվա նիստում հարցաքննել են գործով գլխավոր մեղադրյալին: Սանասար Գաբրիելյանը պատմել է, որ «Իգլա»-ն ինքն է ձեռք բերել՝ Արցախի բանակին նվիրաբերելու համար: Պարզապես խորհուրդ ստանալու համար դիմել է Սամվել Բաբայանին: Վերջինը, մեղադրյալի հավաստմամբ, ասել է, որ այն ընդամենը «զապչաստ է»: Նշենք, որ Սանասար Գաբրիելյանն «Իգլա»-ն գնել է Վրաստանի քաղաքացուց եւ Հայաստան տեղափոխել գործով մյուս մեղադրյալներ Արմեն Պողոսյանի եւ Հրաչյա Մայիլյանի միջոցով: Արմեն Պողոսյանը հայտարարել է, թե հարցաքննության փուլում եկել է այն եզրահանգման, որ այն Սամվել Բաբայանի համար չի բերվել Հայաստան, մինչդեռ նախաքննական ցուցմունքում Պողոսյանը հակառակն է ասել: Այսօրվա նիստում, սակայն, Պողոսյանը հրաժարվել է մեկնաբանել այս հակասական հայտարարությունների պատճառը: Այսօր պետք է հարցաքննվեր նաեւ Սամվել Բաբայանը, սակայն ձայնալարերի հետ կապված խնդրի պատճառով հրաժարվել է:
Արմավիրի Նորապատ գյուղում դատարանի նախկին շենքում խոշոր հրդեհ է բռնկվել. կրակը տեսանելի է եղել նույնիսկ Արմավիր քաղաքից: Երկհարկանի շենքը, որտեղ այժմ ավելի քան 10 ընտանիք է բնակվում, մոխրակույտի է վերածվել: Ականատեսները նշել են, որ նախ ներսում ուժեղ պայթյուն է որոտացել, իսկ հետո հրդեհ է բռնկվել: Նախնական տեղեկություններով՝ զոհեր եւ վիրավորներ չկան: Շենքում բնակվող ընտանիքները, սակայն, փողոցում են հայտնվել:
Վրաստանում անցկացված ՏԻՄ ընտրությունների արդյունքներով համայնքների մեծ մասում հաղթել են «Վրացական երազանք»-ի թեկնածուները. իշխող կուսակցությունն ամբողջ երկրի տարածքով 55.69% ձայն է ստացել: Թբիլիսիում քաղաքապետ է ընտրվել հայտնի ֆուտբոլիստ, իտալական «Միլան»-ի նախկին խաղացող Կախա Կալաձեն՝ 51.06% ձայնով:
Ինչ վերաբերում է Ջավախքին. Վրաստանի հայկական շրջանում պատմության մեջ առաջին անգամ կին քաղաքապետ է ընտրվել: Նինոծմինդայի քաղաքապետ է դարձել «Վրացական երազանք» կուսակցությունը ներկայացնող Անիվարդ Մոսոյանը: Նա ստացել է ընտրողների 77%-ի ձայնը: «Վիրք» չգրանցված կուսակցության համանախագահ Դավիթ Ռստակյանը դժգոհ է ՏԻՄ ընտրություններից: Նրա համոզմամբ՝ դրանք նախապես պատրաստվել էին երկրի հատուկ ծառայությունների կողմից: Ռստակյանը պնդում է, որ նրանք հասել են այն բանին, որ իշխանություններին դեմ հանդես եկող ուժերը չկարողանան մասնակցել ՏԻՄ ընտրություններին, եւ դրանց արդյունքները ոչ ոքի համար անակնկալ չէին:
Ընդհանուր առմամբ, Վրաստանի քաղաքացիները 64 քաղաքապետի եւ համայնքային օրենսդիր մարմինների՝ սակրեբուլոների 64 պատգամավորի են ընտրել: Նախնական արդյունքներով՝ երկրի հինգ քաղաքներում՝ Կազբեգիում, Խաշուրիում, Բորժոմիում, Օզուրգեթիում, Մարթվիլիում եւ Քութաիսիում կարող է քաղաքապետի ընտրությունների երկրորդ փուլ անցկացվել:
Իտալական Լոմբարդիայում եւ Վենետոյում հանրաքվե են անցկացրել. երկրի երկու ամենահարուստ մարզերն ինքնավարության ընդլայնում են ցանկանում: Նախնական տվյալներով՝ երկու մարզում էլ ինքնավարության ընդլայնմանը կողմ է արտահայտվել քվեարկության մասնակիցների ավելի քան 90 տոկոսը: Հավելենք, որ հանրաքվեն իրավական պարտադիր ուժ չունի: Բացի այդ, ի տարբերություն իսպանական Կատալոնիայի՝ իտալական մարզերում քվեարկությունը չի հակասել երկրի Սահմանադրությանը եւ համաձայնեցված է եղել կենտրոնական կառավարության հետ: Այս շրջանների բնակչությունն անկախության չի ձգտում, պարզապես ցանկանում է լրացուցիչ իրավասություններ ստանալ եւ առնվազն երկու անգամ կրճատել Հռոմին փոխանցվող գումարի չափը:
Հոկտեմբերի 23-ին դոլարը շարունակել է թանկանալ, եվրոն ավելի քան 3 դրամով էժանացել է: Դոլարի փոխարժեքը կազմել է 482 դրամ, եվրոյինը՝ 566, ռուբլունը՝ 8 դրամ 39 լումա, ֆունտինը՝ 635 դրամ:
Հոկտեմբերի 24-ին հանրապետությունում սպասվում է առանց տեղումների եղանակ: Օդի ջերմաստիճանը 2-3 աստիճանով կբարձրանա, 27-ին՝ նույնքան կնվազի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +6+8, ցերեկը՝ +20+22 աստիճան տաքություն:
