Երեւանի Շենգավիթ համայնքի դատարանում սկսվել է «Սասնա ծռեր» խմբի գործի երրորդ մասի դատական նիստը:

Դատարանի դահլիճ բերվեցին ամբաստանյալները, որոնց ազգականները եւ կողմնակիցները ծափահարություններով դիմավորեցին: Սակայն հաշվի առնելով ամբաստանյալների թիվը՝ դատարանի դահլիճում ներկաների թիվն ակնհայտորեն սակավ էր եւ զիջում էր մամուլի ներկայացուցիչների թվին:

Գործը դատաքննվում է Երեւանի Էրեբունի եւ Նուբարաշեն ընդհանուր իրավասության դատարանում, սակայն արտագնա նիստը տեղի է ունենում Շենգավիթի դատարանում: Դատական նստը նախագահում է դատավոր Արթուր Օհանյանը: Գոծով 11 ամբաստանյալ է անցնում՝ Արամ Մանուկյանը, Հովհաննես Հարությունյանը, Թաթուլ Թամրազյանը, Արամ Հակոբյանը, Տիգրան Մանուկյանը, Արայիկ Հակոբյանը, Վարդան Գերավետյանը, Մարտիրոս Հակոբյանը, Սերգեյ Կյուրեղյանը, Գեւորգ Իրիցյանը, Թորոս Թորոսյանը: Հիշեցնենք, որ «Սասնա ծռեր» խմբի գործով դատական նիստն անընդհատ հետաձգվում էր ,հետո որոշում ընդունվեց գործը 3 մասին բաժանելու մասին: Առաջինը գտնվում է դատավոր Արտուշ Գաբրիելյանի վարույթում (Ավան եւ Նոր Նորք դատարան), երկրորդ մասը դատավոր Մեսրոպ Մակյանի վարույթում է (Կենտրոն եւ Նորք-Մարաշ դատարան), երրորդ մասը դատավոր Արթուր Օհանյանի վարույթում է:

Դատարանը ստիպված էր ցուցմունքները մասամբ ռուսերենով լսել, քանի որ մեղադրյալ Թաթուլ Թամրազյանը վատ է տիրապետում հայերենին։

Ամբաստանյալ Վարդան Գերավետյանը հայտնեց, որ ՌԴ քաղաքացի է։ Թվարկելով խնդիրները, որոնց բախվում են մեղադրյալները քրեակատարողական հաստատությունում, չնայած անմեղության կանխավարկածին, Գերավետյանը վերջում հավելեց. «Իսկ մնացած ամեն բան, լավ է, հիասքանչ մարքիզուհի»։ Հատկանշական է, որ ծննդյան կամ բնակության վայրի մասին տվյալները, որոնցում հիշատակվում էր Լեռնային Ղարաբաղը, մեղադրյալները ուղղում էին. «Հայաստան, Արցախի մարզ»։

Գեւորգ Իրիցյանը հայտարարեց, որ Վրաստանի քաղաքացի է:

Ամբաստանյալների տվյալները հստակեցնելուց հետո դատավորը ներկայացրեց մեղադրող կողմին եւ հետարքրվեց՝ կողմերն առարկություններ եւ դատախազին բացարկ ներկայացնելու միջնոդություններ ունեն: Ամբաստանյալ Արամ Մանուկյանը հայտարարեց, որ իրենց մեղավոր չեն ճանաչում, մեղադրանքը սարքած է, իսկ դատախազներն ընդհանրապես գործին չեն առնչվում: Նա նաեւ իր վրդովմունքը հայտնեց այն հանգամանքից, որ մեղադրական եզրակացության մեջ նշված չէ խմբի նպատակը՝ իշխանափոխությունը:

Մի շարք ամբաստանյալների ելույթներից հետո, որոնք պնդում էին, որ գործը կեղծված է, ամբաստանյալ Սերգեյ Կյուրեղյանը հայտարարեց, որ դատավորի հետեւում գտնվող զինանշանը եւ դրոշն իրենց տեղում չեն: «Դրանք պետք է մեր թիկունքում լինեն, իսկ ձեր թիկունքում կարող է լինել չեբուրաշկայի պատկերը»,- հայտարարեց Կյուրեղյանը: Չեբուրաշկային վկայակոչումը դատավորը չլսելու տվեց՝ նախընտելով ուշադրությունը չկենտրոնացնել վիրավորանքի վրա: Արդյունքում՝ այնուամենայնիվ դատախազին բացարկ ներկայացնելու միջնորդություններ հնչեցին:

Միջնորդությունը քննարկելու համար հայտարարվեց 40 րոպե ընդմիջում:

Ընդմիջումից հետո դատավորը բացարկի միջնորդությունը մերժեց: