Եվրոպական խորհրդարանի ղեկավարությունը շատ լուրջ ուշադրություն է դարձնում ներկայացուցչական մարմնում սեռական ոտնձգությունների մասին հայտարարություններին և արդեն նախաձեռնություններ ունի այդ հարցի լուծման շուրջ։
Այդ մասին ասվում է Եվրախորհրդարանի հայտարարության մեջ։
Փաստաթղթում նշվում է, որ մարմնի աշխատանքի հենց սկզբից գործել է նաև Եվրախորհրդարանի պատգամավորների խորհրդատվական կոմիտեն, որը վերանայելու էր հետապնդումների մասին օգնականների ու իր անդամների բողոքները, սակայն մինչ օրս ոչ մի բողոք չի ստացվել։
«Ցնցվեցի ու զարմացա, երբ իմացա Եվրախորհրդարանում սեռական ոտնձգությունների շուրջ վերջին հայտարարությունների մասին։ Սակայն ցնցվելը պատասխան լինել չի կարող»,– հայտարարել է Եվրախորհրդարանի նախագահ Անտոնիո Տայանին։
Նրա խոսքով, չնայած, որ մեկ տարի առաջ հետապնդումների շուրջ բողոքների վերանայման կոմիտեի գոյության մասին իրազեկումը բարձրացնելու քայլեր են ձեռնարկվել, անհրաժեշտ է նաև հետագայում բարձրացնել արդեն իսկ տեղի ունեցած դեպքերի մասին իրազեկվածությունը։
Վերջերս բրիտանական The Sunday Times պարբերականը, Politico համացանցային պորտալը և այլ լրատվամիջոցներ հրապարակեցին կանանց հայտարարությունները՝ սեռական տարբեր ոտնձգությունների և իրենց մարմնին արական սեռի եվրախորհրդարանականների կողմից դիպչելու փորձերի մասին։