«Ամերիաբանկը» նախատեսում է երկարացված աշխատանքային օրով եւս մեկ մասնաճյուղ բացել «Ռիո» առեւտրի կենտրոնի տարածքում: Հոկտեմբերի 24-ին լրագրողների հետ զրույցում այս մասին հայտնեց «Ամերիաբանկի» մանրածախ բանկինգի տնօրեն Արման Բարսեղյանը:
Նրա խոսքով՝ առեւտրի կենտրոնների տարածքներում փոքր, բայց ունվերսալ մասնաճյուղերի բացումը, որը բոլոր ծառայությունները տրամադրում է, իրեն արդարացրել է: Այսօր այդպիսի մասնաճյուղեր են արդեն գործում «Մետրոնոմ» (մետրո Երիտասարդական) եւ «Արշակունյաց» առեւտրի կենտրոնների տարածքներում: Դրանք աշխատում են մինչեւ 21.30, մեծ ծանրաբեռնվածությամբ եւ արդեն հաճախորդների ընդարձակ բազա ունեն: Բացի «Ռիոյում» բացված մասնաճյուղից, նախատեսվում է այսպիսի մի մասնաճյուղ էլ բացել հաջորդ տարվա սկզբին, սակայն տեղը դեռեւս չի ընտրվել:
«Մենք այն վայրերն ենք ընտրում, որտեղ հաճախորդների մեծ կուտակումներ կան: Այս տեսակետից առտեւտրի կենտրոնները շատ հարմար են: Սակայն կարող են նաեւ այլ վայրեր լինել, խոշոր բիզնես ձեռնարկությունների տարածքներ եւ այլն»,- ասաց Արման Բարսեղյանը: