Հայկական բերքը դեռ հնարավորություն ունի զբաղեցնել ռուսական շուկայում պատժամիջոցների տակ հայտնված մրգերի եւ բանջարեղենի տեղը։ Այս մասին հոկտեմբերի 24-ին՝ ՀՀ վարչապետ Կարեն Կարապետյանի հետ հանդիպման ժամանակ, ասել է ՌԴ վարչապետ Դմիտրի Մեդվեդեւը։
Ռուսաստանում ավանդաբար սիրում են հայկական մրգերը, հյութերն ու պահածոները։ «Իսկ իմ գործընկերը հենց նոր ասաց, որ լինում է նաեւ ուշ հասնող ծիրան, որի բերքը հիմա են հավաքում։ Այնպես որ լավ պոտենցիալ կա, հատկապես եթե հաշվի ենք առնում, որ մեր երկիրը, սեփական գյուղատնտեսության զարգացումից բացի, դեռեւս պահպանում է պտուղ–բանջարեղենի մատակարարման սահմանափակումները որոշ երկրներից։ Դա, իհարկե, օգնում է ԵՏՄ–ում մեր գործընկերների, մասնավորապես, Հայաստանի հետ համագործակցությանը»,– ասել է Մեդվեդեւը։
Դեռեւս, միգուցե, չկան խոշոր վերամշակող գործարաններ եւ ջերմոցային տնտեսություններ, սակայն հեռանկարում բիզնեսը կարող է զբաղվել դրանով, հավելել է ՌԴ վարչապետը եւ հավելել, որ Հայաստան ռուսական գյուղատնտեսական տեխնիկայի մատակարարման տարբերակներ կան։