Կարեն Կարապետյանի հրավերով երկօրյա պաշտոնական այցով Հայաստանում է Ռուսաստանի վարչապետը: Օդանավակայանում ռուսաստանցի գործընկերոջը դիմավորել է Հայաստանի վարչապետը, իսկ հետո Դմիտրի Մեդվեդեւը գնացել է Ծիծեռնակաբերդ:

Երկու երկրների վարչապետերն առանձնազրույց են ունեցել, հետո տեղի են ունեցել ընդլայնված ձեւաչափով քննարկումներ: Վարչապետները գոհ են համագործակցության արդյունքներից: Արդեն լրագրողների հետ ճեպազրույցում Դմիտրի Մեդվեդեւը հայտարարել է. Հայաստանի համար ռուսական գազի հատուկ գինը կպահպանվի նաեւ 2018 թվականին: Հիշեցնենք, որ 2016-ի ապրիլից Հայաստանը Ռուսաստանից գազ է գնում 1.000 խ/մ-ը 150 դոլարով։

Մեդվեդեւը գոհ է նաեւ գյուղատնտեսության ոլորտում երկու երկրների համագործակցությունից: Հայկական բերքը հնարավորություն ունի նույնիսկ զբաղեցնել ռուսական շուկայում պատժամիջոցների տակ հայտնված մրգերի եւ բանջարեղենի տեղը, հատկապես՝ հայկական ծիրանը: Հայաստանն էլ ուրախ կլինի ռուսական բիզնեսը տեսնել Իրանի հետ սահմանին՝ Ազատ տնտեսական գոտում: Ռուսական կողմը պատրաստ է առավել մանրամասն քննարկել հնարավորությունները:

Այսօր Դմիտրի Մեդվեդեւը հանդիպել է նաեւ նախագահ Սերժ Սարգսյանին, իսկ վաղը՝ հոկտեմբերի 25-ին, մասնակցելու է Եվրասիական միջկառավարական խորհրդի նիստին: ԵՏՄ անդամ պետությունների վարչապետերը քննարկելու են միության մաքսային տարածքում ապրանքների անօրինական շրջանառության հակազդեցության միջոցները:

Ազգային ժողովի այսօրվա նիստում «Ելք»-ի պատգամավորները ներկայացրել են «Ձերբակալված եւ կալանավորված անձանց պահելու մասին» օրենքում փոփոխությունների նախագիծը: Նիկոլ Փաշինյանը հիշեցրել է, որ եթե անձը կալանավորված է, եւ քննիչը որոշում է կայացրել սահմանափակել նրա տեսակցությունները, պատգամավորին թույլ չեն տալիս մտնել նրա մոտ: Մինչդեռ իրենք ոչ թե տեսակցության են գնում, այլ ահազանգերի հետքերով:

ՀՀԿ-ական Հրայր Թովմասյանը հակադարձել է, թե շատ քիչ երկրներում է, որ պատգամավորներն իրավունք ունեն անարգել մուտք գործել քրեակատարողական հիմնարկներ: Էդմոն Մարուքյանին սա զայրացրել է:

«Ծառուկյան» խմբակցության պատգամավոր Միքայել Մելքումյանն էլ դժգոհել է. քաղաքական մեծամասնությունը մերժում է ընդդիմադիրների ներկայացրած նախագծերը: ՀՀԿ-ական Խոսրով Հարությունյանը տեղից ընդհատել է նրան, կրքերը թեժացել են: Լեզվակռվում «վերջին խոսքն» ասել է Նաիրա Զոհրաբյանը՝ կոչ անելով սպառնալիքներ չհնչեցնել:

Պատգամավորներն այսօր քննարկել են նաեւ զինվորական ծառայության եւ պաշտպանության մասին օրինագծերը: Ազգային ժողով եկած պաշտպանության նախարարի Նիկոլ Փաշինյանը հետաքրքրվել է, թե ի՞նչ կոնկրետ լծակներ են սահմանվելու, որոնցով հնարավոր կլինի ապահովել զինված ուժերի զսպվածությունն ու չեզոքությունը ներքաղաքական հարցերում: Փաշինյանը, սակայն, հիշեցրել է. նախկինում նույնպես օրենքը դա ապահովում էր, բայց քաղաքական պրոցեսներին զինված ուժերի ներգրավվածության դեպքեր եղել են: Նախարարը համաձայնել է. օրենքի ընդունումից հետո պետք է ամեն ինչ անել, որ այն լիարժեք կիրառվի: Մինչ այդ խորհրդարանի միջանցքում Վիգեն Սարգսյանը հրաժարվել է պատասխանել սահմանային իրավիճակի մասին լրագրողների հարցին:

Հավելենք, որ Արցախի պաշտպանության բանակի հրամանատարն այսօր լրագրողներին ասել էր, որ մեկ շաբաթ առաջվա իրավիճակի հետ համեմատ՝ հիմա որոշակի լարվածություն կա: Լեւոն Մնացականյանը նաեւ չէր բացառել, որ  աստիճանաբար լարվածության աճ կլինի, եւ հիշեցրել, որ եթե հետագայում եւս հարվածներ լինեն, հայկական կողմը կպատասխանի:

Տրանսպորտի նախարարը դժգոհ է Հյուսիս-հարավ մայրուղու որոշ հատվածների շինարարության որակից: Վահան Մարտիրոսյանը հրահանգել է դադարեցնել Թալին-Լանջիկ հատվածի բետոնաբատումը: Այս հատվածում աշխատում է չինական «Սինոհիդրո»-ն: Առանց կատարվածի որակը թեստավորելու՝ ընկերությունը ճանապարհի 1200 մետրի բետոնապատում է իրականացրել, մինչդեռ թեստային փորձանմուշի համար անհրաժեշտ էր բետոնապատել միայն 300 մետրը: Որակի լաբորատոր փորձաքննություն է կատարվում: Եթե արդյունքները չհամապատասխանեն սահմանված չափորոշիչներին, չինական ընկերությունը ստիպված կլինի քանդել եւ նորից կատարել աշխատանքը: Հարցն այսօր չինական «Սինոհիդրո»-ի փոխնախագահի հետ հանդիպմանը բարձրացրել է նաեւ վարչապետ Կարեն Կարապետյանը: Նա պահանջել է անհրաժեշտ քայլեր ձեռնարկել եւ վերացնել առաջացած բոլոր խնդիրները:

Տեւական ընդմիջումից հետո այսօր մեկնարկել է «Սասնա ծռեր» խմբի 11 անդամի գործից առանձնացված մասով դատական նիստը: Այն քննում է Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը: Ամբաստանյալների տվյալները հստակեցնելուց հետո դատավորը ներկայացրել է մեղադրող կողմին եւ հետաքրքրվել՝ արդյո՞ք կողմերն առարկություններ եւ դատախազին բացարկ ներկայացնելու միջնորդություն ունեն: Ամբաստանյալ Արամ Մանուկյանը հայտարարել է, թե իրենց մեղավոր չեն ճանաչում, «մեղադրանքը սարքած է, իսկ դատախազներն ընդհանրապես գործին չեն առնչվում»: Մի շարք ամբաստանյալների ելույթներից հետո պաշտպանները բացարկ են հայտնել դատախազ Պետրոս Պետրոսյանին, որը, սակայն, դատարանը մերժել է: Նիստը հետաձգվել է, հաջորդը կկայանա հոկտեմբերի 31-ին:

Հիշեցնենք, որ «Սասնա ծռեր» խմբի գործով դատական նիստն անընդհատ հետաձգվում էր, հետո որոշվեց գործը 3 մասին բաժանել: Մյուս երկու գործերը քննում են Արտուշ Գաբրիելյանը եւԿենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանը: Վերջինի նախագահությամբ առաջին նիստը տեղի կունենա նոյեմբերի 1-ին:

Ուկրաինայի Միգրացիոն ծառայությունը հրաժարվել է Միխայիլ Սահակաշվիլիին փախստականի կարգավիճակ տալ: Այդ երկրի գլխավոր դատախազը հայտարարել է, որ Օդեսայի նախկին նահանգապետն այդ հարցով դատարան չի դիմել: Յուրի Լուցենկոն նաեւ հավելել է, որ այժմ Կիեւն իրավունք ունի Սահակաշվիլիին արտաքսել երկրից արտաքսել կամ արտահանձնել: Լուցենկոն Սահակաշվիլիին նաեւ մեղադրել է «կարմիր գիծն անցնելու» եւ իշխանությունը զավթելու համար սադրանքներ հրահրելու մեջ՝ հավելելով, որ հետաքննությունն այդ մասին տվյալներ ունի: Վրաստանի նախկին նախագահն այս հայտարարությունը կեղծիք է որակել եւ խոստացել ասուլիս հրավիրել ու պատասխանել դրան:

Հրապարակվել է տարվա լավագույն ֆուտբոլիստի անունը. երկրորդ տարին անընդմեջ աշխարհում լավագույնն է ճանաչվել պորտուգալացի ֆուտբոլիստ Կրիշտիանու Ռոնալդուն: Այդ տիտղոսի հավակնորդների եռյակում էին նաեւ արգենտինացի Լիոնել Մեսին («Բարսելոնա») եւ բրազիլացի Նեյմարը (ՊՍԺ): Տարվա լավագույն մարզիչը ֆրանսիացի Զինեդին Զիդանն է («Ռեալ»), լավագույն դարպասապահ է ճանաչվել իտալացի Ջանլուիջի Բուֆոնը («Յուվենտուս»), լավագույն գոլի համար Պուշկաշի անվան մրցանակն էլ ստացել է ֆրանսիացի Օլիվյե Ժիրուն («Արսենալ»): Նշենք, որ ՖԻՖԱ-ի տարվա լավագույն ֆուտբոլիստի քվեարկությանը մասնակցում են ազգային հավաքականների գլխավոր մարզիչներն ու ավագները, լրագրողներ եւ երկրպագուներ:

Դոլարն ավելի քան մեկ շաբաթ է՝ դանդաղ, բայց անշեղորեն ամրապնդում է դիրքերը: Հոկտեմբերի 24-ին դոլարի փոխարժեքը կազմել է 482 դրամ, եվրոյինը՝ 567, ռուբլունը՝ 8 դրամ 39 լումա, ֆունտինը՝ 635 դրամ:

Հոկտեմբերի 25-ին հանրապետությունում սպասվում է առանց տեղումների եղանակ: Օդի ջերմաստիճանը 1-2 աստիճանով կբարձրանա, 27-ից 3-4 աստիճանով կնվազի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +6+8, ցերեկը՝ +22+24 աստիճան տաքություն: