WikiLeaks-ը հրապարակել է Ստոկհոլմում ԱՄՆ գործերի ժամանակավոր հավատարմատար Լորա Կիրկոնելի զեկույցը` բարձրաստիճան եվրոպացի դիվանագետների եւ ԱՄՆ պետքարտուղարի Եվրոպայի ու Եվրասիայի հարցերով տեղակալ Ֆիլիպ Գորդոնի 2009 թվականին կայացած հանդիպման մասին: Գորդոնն անդրադարձել է նաեւ ղարաբաղյան հակամարտության կարգավորմանը:
«Ղարաբաղյան հիմնախնդրի լուծումը եւս հայ-թուրքական հարաբերությունների կարգավորման բանալի է: Կարծում եմ, որ Լեռնային Ղարաբաղի հիմնախնդրի լուծումը նաեւ կնպաստի էներգակիրների առաքումների տարածաշրջանային ծրագրերի իրականացմանը: Ղարաբաղյան հարցի կարգավորումը կնպաստի գազի արտահանման հարավային միջանցքի ձեւավորմանը», - հայտարարել է Գորդոնը:
Գաղտնազերծած զեկույցի համաձայն, Գորդոնը նաեւ շեշտել է Մոսկվայի դերը ղարաբաղյան կարգավորման գործընթացում:
«Ռուսներն արդյունավետ են աշխատում, սակայն առայժմ պարզ չէ, թե նրանք ձեւական քայլեր են անում, թե, իսկապես, ուզում են լուծել խնդիրը»,- ասել է պետքարտուղարի տեղակալը:
Զեկույցի համաձայն, եվրոպացի դիվանագետները ղարաբաղյան հարցում ռուսների դերակատարությանը մոտեցել են լուրջ վերապահումներով:
Եվրամիության Խորհրդի քարտուղարության բարձրաստիճան ներկայացուցիչ, բրիտանացի դիվանագետ Ռոբերտ Կուպերը դիմելով Գորդոնին ասել է. «Եթե ռուսներն ուզենային լուծել այս խնդիրը, ապա վաղուց լուծած կլինեին»:
Ստոկհոլմյան հանդիպման ընթացքում Ֆիլիպ Գորդոնն անդրադարձել է նաեւ ռուս-ամերիկյան հարաբերություններին, այդ թվում կապված Վրաստանի, Աբխազիայի եւ Հարավային Օսիայի հետ:
Գորդոնը հայտարարել է. «Մենք ուզում ենք բարելավել հարաբերությունները Ռուսաստանի հետ, բայց մի շարք հարցերում զիջումներ չեն լինի, մասնավորապես, Հարավային Օսիան ու Աբխազիան չեն ճանաչվի որպես անկախ պետություններ: ԱՄՆ-ն այդ կարգի փոխզիջումների չի գնում: Մեր ջանքերի շնորհիվ որոշ միջազգային կազմակերպություններում, մասնավորապես, ԵԱՀԿ-ում Ռուսաստանը հայտնվել է մեկուսացման մեջ»:
Եվրամիության ներկայացուցիչները Վաշինգտոնին կոչ են արել դիվանագիտական ճնշում գործադրել Միխայիլ Սահակաշվիլիի կառավարության վրա: ԵՄ Խորհրդի քարտուղարության քաղաքական հարցերով համակարգող Հելգա Շմիդտը Գորդոնին ասել է. «Պետք է համոզել պաշտոնական Թբիլիսիին` աշխատել Աբխազիայի հետ: Վրաստանի կողմից իրենց առաջարկին մերժում ստանալուց հետո աբխազներին ոչինչ չէր մնում, քան աջակցություն փնտրել Ռուսաստանից»:
«Թբիլիսիում պետք է հստակ գիտակցեն, որ մենք կշարունակենք աջակցել Վրաստանին, բայց չենք պատրաստվում ազատություն տալ Սահակաշվիլին»,- գաղտնի փաստաթղթի համաձայն, նշել են Եվրամիության ներկայացուցիչները, հաղորդում է Ազատություն ռադիոկայանը:
