ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանի գլխավորած պատվիրակությունը Հռոմում մասնակցել է «Հայաստան. համագործակցության հնարավորությունները ճանապարհաշինության ոլորտում» խորագրով համաժողովին։ Այն կազմակերպվել է «ANAS INTERNATIONAL ENTERPRISE» միջազգային ձեռնարկության եւ Իտալիայի արտաքին գործերի նախարարության համատեղ ջանքերով։
Նախարարությունից NEWS.am-ին հայտնում են, որ համաժողովին ելույթներով հանդես են եկել ՀՀ տրանսպորտի, կապի եւ տեղեկատվական տեխնոլոգիաների նախարար Վահան Մարտիրոսյանը, Իտալիայի ԱԳ եւ միջազգային համագործակցության նախարարության գլխավոր քարտուղարի տեղակալ Բենեդետտո Դելլա Վեդովան, Իտալիայում ՀՀ արտակարգ եւ լիազոր դեսպան Վիկտորիա Բաղդասարյանը, «ANAS INTERNATIONAL ENTERPRISE» SPA-ի նախագահ Ստեֆանո Գրանատին, նախարարության «Տրանսպորտային ծրագրերի իրականացման կազմակերպություն» ՊՈԱԿ-ի գլխավոր տնօրենի ժամանակավոր պաշտոնակատար Վարդան Կարապետյանը։
Նախարարն իր ելույթում անդրադարձել է Հայաստանում իրականացվող ճանապարհաշինական ծրագրերին, առավել մանրամասն ներկայացրել «Հյուսիս-հարավ ճանապարհային միջանցք ներդրումային ծրագրի» առանձնահատկությունները, դրա նշանակությունն ու կարեւորությունը, ծրագրի շրջանակներում իրականացված աշխատանքները։ Նա ընդգծել է, որ մեր երկրի հյուսիսը հարավին կապող այս ճանապարհը ոչ միայն Հայաստանի, այլեւ տարածաշրջանի համար կարեւոր նշանակություն ունի, քանի որ այն ավտոմոբիլային միջանցք կդառնա Իրանից մինչեւ Սեւ ծով տարանցիկ երթեւեկության համար։
Համաժողովի ընթացքում, որին մասնակցել են Իտալիայում ճանապարհաշինական ոլորտում հայտնի կազմակերպությունների եւ ընկերությունների ներկայացուցիչներ, մի շարք այլ հարցերի թվում քննարկվել են նաեւ «Հյուսիս-հարավ» ավտոմայրուղու կառուցապատման աշխատանքներում իտալական ճանապարհաշինական ընկերությունների հետ համագործակցության հնարավորությունները:
