Տնտեսական աճի հիմքերը բավարար ամուր չեն երկարաժամկետ բարձր տնտեսական աճի հավակնելու համար: Այս մասին, այսօր՝ ԱԺ հանձնաժողովների համատեղ նիստում, «ՀՀ 2018 թ. պետական բյուջեի մասին» ՀՀ օրենքի նախագծի նախնական քննարկման ժամանակ ասաց երկրի վարչապետ Կարեն Կարապետյանը։
Նրա խոսքով, հաշվի առնելով 2017-2022 թվականների կառավարության ծրագրի նպատակադրումները, 2018 թվականի բյուջեում հարկաբյուջետային քաղաքականության մեջ փոփոխություններ են նախատեսվել. «Միջնաժամկետ հեռանկարում, հարկաբյուջետային քաղաքականությունը իրականացվելու է ծախսային կառուցվածքի վերանայմամբ՝ առավել շեշտադրելով կապիտալ ծախսերը:
Վերջին մի քանի տարիներին ՀՀ տնտեսությունը արտաքին աշխարհից ներթափանցող բացասական ցնցումների է ենթարկվում, որի հետեւանքով տնտեսական աճի ցածր մակարդակ է գրանցվել՝ նվազեցնելով տնտեսական աճի ներուժը: Ընթացիկ զարգացումները, չնայած հուսադրող են, սակայն տնտեսական աճի հիքմերը բավարար ամուր չեն երկարաժամկետ բարձր տնտեսական աճի հավակնելու համար», - ասաց վարչապետը։
Վերջինիս խոսքով, 2017-ին հաստատվել է բյուջետային մի շրջանակ հաստատվեց, որը բնորոշում է տնտեսական աճի կայունացումը, իսկ 2018-ին կառավարությունը ծրագրել է այնպիսի հարկաբյուջետային քաղաքականություն, որը կկանխորոշի հետագա տնտեսական զարգացումների մեկնարկը. «Այլ խոսքով, հարկաբյուջետային քաղաքականությունը հիմքեր կստեղծեի ապագայում միջինում 5 տոկոսանոց տնտեսական աճ ապահովել։ Բոլորից մեծ ջանքեր ու ծավալուն աշխատանք կպահանջվի նշված ցուցանիշին հասնելու համար»:
Վարչապետը նշեց նաեւ, որ պետական բյուջեի ծախսային քաղաքականությունը հիմնված է լինելու հստակ կանոնների վրա, որի առանցքում դրվել են ինչպես տնտեսական աճը, երկրի անվտանգությունը, այնպես էլ սոցիալական նպատակայնությունը. «Մեր եկամտային քաղաքականությունը լինելու է հավասարակշռված թե ստվերային տնտեսության կրճատման, թե գործարար միջավայրի բարելավման տեսանկյունից»:
