Իրաքի Քուրդիստանում նախագահի պաշտոնը կպահպանվի, ընտրությունները կանցկացվեն 2018-ի հուլիսին՝ խորհրդարանականի հետ միասին, «ՌԻԱ Նովոստի»-ին հայտնել է Մոսկվայում Քուրդիստանի Դեմոկրատական կուսակցության ներկայացուցիչ Հոշավի Բաբաքրը:
«Դարձյալ, այո, նախագահը դարձյալ կընտրվի»,- հայտարարել է Բաբաքրը: Ինչպես նախկինում էր ծրագրվել, նոր նախագահի ընտրությունները կանցկացվեն խորհրդարանական ընտրությունների հետ: Հիմա դրանք նշանակված են 2018 թվականի հուլիսին:
Ինչ վերաբերում է Բարզանիի անձնական մասնակցությանը, ապա նա հազիվ թե կրկին առաջադրվի:
«Ո՛չ, չեմ կարծում»,- հայտարարել է Բաբաքրը՝ հիշեցնելով, որ հանրաքվեից առաջ Բարզանին խոստացել էր, որ ինքն ու իր ընտանիքի անդամները նոր ընտրություններին չեն մասնակցի: Բաբաքրը կարծում է, որ Բարզանին հոգնել է նախագահի պաշտոնից՝ հանրաքվեից առաջ նա բախվել է միջազգային հանրության ճնշմանը, կան ներքին քաղաքական եւ տնտեսական խնդիրներ:
