Ավստրալիայի Վիկտորիա նահանգի կառավարության հրավերով Հանքարդյունաբերության եւ բնական պաշարների տարեկան միջազգային համաժողովին մասնակցելու նպատակով Մելբուռնում գտնվող ՀՀ էներգետիկ ենթակառուցվածքների եւ բնական պաշարների նախարար Աշոտ Մանուկյանն այսօր հանդիպել է Բնական պաշարների պետական նախարար եւ գանձապետ Թիմ Պալլասի հետ: Քննարկվել են Հայաստանի ընդերքի օրենսդրության զարգացման եւ հանքարդյունաբերության ոլորտում հնարավոր համագործակցության ուղղությունները:
Նախարարությունից NEWS.am-ին հայտնում են, որ կողմերն անդրադարձել են ոլորտի կարգավորման ստանդարտներին, երկրաբանական երեւակումների եւ ընդերքի շահագործման գործնական խնդիրներին՝ «պատասխանատու ընդերքօգտագործման» հիմնարար սկզբունքների համատեքստում:
Աշոտ Մանուկյանը ներկայացրել է ընդերքօգտագործման ոլորտում մեր երկրում իրականացված նորամուծությունները, մասնավորապես՝ ընդերքի շահագործման լիցենզիաների տրամադրման պայման հանդիսացող հանքի ապագործարկման նախագծի եւ համապատասխան ֆինանսական երաշխիքների ներդրման անհրաժեշտությունը:
Քննարկվել են նաեւ Արդյունահանող ճյուղերի թափանցիկության նախաձեռնությանը Հայաստանի անդամակցության գործընթացի եւ Հայաստանի երկրաբանական ֆոնդի արխիվի թվայնացման ու տեղեկությունների հասանելիությանն ուղղված Հայաստանի կառավարության ջանքերը:
Համաժողովի շրջանակներում Աշոտ Մանուկյանը հանդիպումներ է ունեցել նաեւ Իրանի Իսլամական Հանրապետության արդյունաբերության, հանքերի եւ առեւտրի փոխնախարար Մեհդի Կարբասիանի, GFG Alliance միջազգային կորպորացիայի գործադիր նախագահ Սանջեեւ Գուպտայի հետ:
