Արմավիրի «Մանուշակ» մանկապարտեզում 3-ամյա երեխայի պատանդառած, դանակով նախկին կնոջը, իսկ հետո ինքն իրեն վնասվածքներ հասցրած Արգամ Հովիկյանը ձերբակալվել է, հարուցված քրեական գործով 3 անձ տուժող է ճանաչվել: Տղամարդը երեկ ուշ երեկոյան վիրահատվել է. նա վերակենդանացման բաժանմունքում է, վիճակը միջին ծանրության է գնահատվում: Վիրահատվել եւ վերակենդանացման բաժանմունք է տեղափոխվել նաեւ Հովիկյանի նախկին կինը: 23-ամյա կինը մանկապարտեզի տնօրենի դուստրն է, այնտեղ դաստիարակչուհի է աշխատում:
NEWS.am-ի տեղեկություններով՝ Արգամ Հովիկյանը կնոջ հետ մի քանի ամիս է ապրել, իսկ ամուսնալուծվելուց հետո մշտապես հետապնդել է նրան: Նա պարբերաբար դարանակալել է կնոջ տան մոտ, փորձել տուն ներխուժել, վեճի է բռնվել ընտանիքի անդամների հետ: Հիշեցնենք, որ հոկտեմբերի 30-ին դանակով զինված Արգամ Հովիկյանը գնացել է Արմավիր քաղաքի «Մանուշակ» մանկապարտեզ՝ նախկին կնոջը տեսնելու: Նրան հանդիպել է մանկապարտեզի բակում, դանակով վնասվածք հասցրել, բայց կնոջը հաջողվել է փախչել: Հետո տղամարդը ներխուժել է մանկապարտեզի շենք ու պատանդ վերցրել 3 տարեկան մի երեխայի ու դաստիարակներին. նա հանդիպում է պահանջել նախկին կնոջ եւ երեխայի հետ: Պատանդառուի հետ իրավապահների երկարատեւ բանակցություններից հետո մանկապարտեզի ներսում կրակոցներ են հնչել, ինչից հետո շենքից դուրս են բերել ավելի քան 4 ժամ պատանդ պահվող 3-ամյա երեխային. նա վնասվածքներ չի ստացել:
2018 թվականին Հայաստանում էլեկտրաէներգիան չի թանկանա, սակայն ջրի սակագնի հարցը դեռ պետք է քննարկվի: Ազգային ժողովում բյուջե-2018-ի քննարկումներին մասնակցող Հանրային ծառայությունները կարգավորող հանձնաժողովի փոխնախագահը տեղեկացրել է, որ «Վեոլա ջուր» ընկերությունը 1 խ.մ.-ի սակագինը 14 դրամով կամ 7.7 տոկոսով թանկացնելու հայտ է ներկայացրել: Եթե այն հիմնավորված համարվի, ապա 180 դրամի փոխարեն ջրի սակագինը կկազմի 194 դրամ:
2016 թվականի մայիսից գազալցակայաններում հեղուկ գազի 1 խ.մ.-ի համար 8.33 դրամի ակցիզ է մտցվել, որը 2018 թվականի հունվարից կբարձրանա եւ կկազմի 25 դրամ: Սակայն, ըստ ՊԵԿ փոխնախագահի, ակցիզի թանկացման հետեւանքով տրանսպորտի ուղեվարձը չպետք է թանկանա: Վախթանգ Միրումյանը պարզաբանել է. 2017-ի հունվարից երկրում գազն էժանացել է, ինչի արդյունքում նվազել է նաեւ հեղուկ գազի գինը՝ մեկ խորանարդ մետրը 200 դրամից մինչեւ 170-180 դրամ: Հիմա պարզապես սակագինը կվերադառնա նախկին մակարդակին:
Իսկ Ազգային ժողովի շենքի առջեւ այսօր բողոքի ակցիա էին կազմակերպել երկու տոնավաճառների առեւտրականները: Նրանք դժգոհում են, որ հարկային ծառայության աշխատակիցները յուրաքանչյուր ներկրած ապրանքի շարժի համար փաստաթուղթ են պահանջում, ինչը, ըստ նրանց, ավելորդ ու բարդ թղթաբանություն է եւ հավելյալ ծախսեր է պահանջում: ՊԵԿ նախագահը հակադարձում է. իրենք անվճար հաշվապահական ծառայություն են առաջարկել:
Լրագրողները Վարդան Հարությունյանին հարցրել են նաեւ, թե ինչպե՞ս է ստացվում, որ կառավարության հարկային արտոնություններից օգտվում են հիմնական պաշտոնյաների հետ փոխկապակցված տնտեսվարողները: ՊԵԿ նախագահը վստահեցրել է, որ արտոնություններից սահմանված կարգով օգտվում են բոլորը: Իսկ իր որդիների բիզնեսների մասին հարցը վերջնականապես հունից հանել է Հարությունյանին:
Երեւանի ավագանու հերթական նիստն այսօր էլ թեժ մթնոլորտում է անցել: Օրակարգի գլխավոր հարցն «Արաբկիրի մշակութային կենտրոն»-ի՝ հայտնի Կանազի մշակույթի պալատի շենքը 10 տարով անհատույց դերասան Հրանտ Թոխատյանին պատկանող հիմնադրամին տրամադրելն էր: Դեմ են քվեարկել «Երկիր Ծիրանի» խմբակցության երեք անդամները, իսկ հարցի քննարկման ժամանակ փորձել են հիմնավորել, թե ինչու: Սոնա Աղեկյանը դերասանին մեղադրել է իշխանություններին ծառայելու եւ տարիների լռության դիմաց շենքը նվեր ստանալու մեջ՝ նրան անվանելով «գավառական թամադա»:
Դերասանն էլ հայտարարել է, որ քանդված վիճակում գտնվող շենքը վերանորոգվելու է, հիմնվելու է մանկական թատրոն: Իսկ «գավառական թամադա» արտահայտությանն էլ պատասխանել է, թե միայն հարսանիքի է գնացել, դրա համար էլ իրեն որպես թամադա է ճանաչում: Եթե թատրոն էլ գնար, կիմանար, որ ինքը նաեւ դերասան է:
Ավագանու նիստում միջադեպերն այսքանով չեն սահմանափակվել: Կրքերը բորբոքել են նաեւ «Երկիր Ծիրանի»-ից Մարինա Խաչատրյանն ու «Ելք»-ից Անի Խաչատրյանը: Երբ Մարինա Խաչատրյանի երկարաշունչ ելույթից հետո Անի Խաչատրյանը քմծիծաղով արձագանքել է, թե ավագանու անդամը, երեւի, ելույթին երկար էր պատրաստվել, «Երկիր Ծիրանի»-ի անդամը նրան հանգստացնող դեղորայք է առաջարկել:
Համացանցում ապօրինի որսի մասին վկայող հերթական լուսանկարներն են հայտնաբերվել: EcoNews.am բնապահպանական կայքի հրապարակման «հերոս որսորդն» այս անգամ հոգեւորական է, կայքի տվյալներով՝ Աշտարակի Սուրբ Կարմրավոր եկեղեցու եւ Նոր Եդեսիա համայնքի հոգեւոր հովիվ Տեր Ղեւոնդ քահանա Գափոյանը: Մասնագետների հավաստմամբ՝ 2011-2012 թվականներին հրապարակված նկարներում պատկերված սպանված թռչունները մկնաճուռակի տարատեսակներ են՝ տափաստանային եւ մարգագետնային մկնաճուռակներ, որոնք ընդգրկված են Կարմիր գրքում: Մարգագետնային մկնաճուռակների թիվը, նախնական գնահատմամբ, Հայաստանում 5-10 բնադրող զույգ է կազմում, իսկ տափաստանային տեսակի հստակ թիվը հայտնի չէ:
Լեւոն Արոնյանը Շախմատի միջազգային ֆեդերացիայի դասակարգման աղյուսակում պահպանել է երկրորդ տեղը: Հայկական շախմատի առաջատարի վարկանիշը շարունակում է մնալ նույնը՝ 2801: ՖԻԴԵ-ի դասակարգման անփոփոխ առաջատարն աշխարհի չեմպիոն Մագնուս Կարլսենն է, որի վարկանիշը հասել է 2837: Նշենք, որ 100 լավագույն գրոսմայստերների ցուցակում տեղ են գտել Հայաստանի եւս 3 ներկայացուցիչներ. Սերգեյ Մովսեսյանը 76-րդն է, Վլադիմիր Հակոբյանը՝ 77-րդը, իսկ Գաբրիել Սարգսյանը՝ 97-րդը:
Դոլարն ու եվրոն շարունակում են թանկանալ, ռուբլին փոքր-ինչ թուլացել է: Հոկտեմբերի 31-ին դոլարի փոխարժեքն արդյունքում կազմել է 482 դրամ, եվրոյինը՝ 561, ռուբլունը՝ 8 դրամ 30 լումա, ֆունտինը՝ 637 դրամ:
Նոյեմբերի 1-ին հանրապետության շրջանների զգալի մասում տեղումներ են սպասվում: Օդի ջերմաստիճանը 5-6 աստիճանով կնվազի: Երեւանում նոյեմբերի 1-ի գիշերը սպասվում է անձրեւ, 2-5-ը՝ առանց տեղումների եղանակ: Մայրաքաղաքում գիշերը կդիտվի +7+9, ցերեկը՝ +13+15 աստիճան տաքություն: