Եվրամիությունը 4 ծրագրով 11 մլն եվրոյի բյուջետային աջակցություն է հատկացնելու Հայաստանին: Այս մասին այսօր՝ նոյեմբերի 2-ին, խորհրդարանում եվրոպական ինտեգրման հարցերի ու ֆինանսավարկային եւ բյուջետային հարցերի մշտական հանձնաժողովների համատեղ նիստում «Հայաստանի Հանրապետության 2018թ. պետական բյուջեի մասին» ՀՀ օրենքի նախագծում նախատեսված եկամուտներ եւ ծախսեր` եվրոպական ինտեգրում» թեմայով քննարկման ժամանակ ասաց Ֆինանսների նախարարի առաջին տեղակալ Ատոմ Ջանջուղազյանը:
«4 հիմնական դրամաշնորհային ծրագրերի համար է այդ աջակցությունը՝ մարդու իրավունքների պաշտպանություն, պետական ֆինանսական բարեփոխումներ, որակավորումների բարելավում ավելի լավ աշխատատեղ գտնելու համար, ծառայությունների մատուցման բարելավում: Այսինքն այն ծրագրերը, որոնք նախատեսել ենք իրականացնել, Եվրամիությունն իր աջակցությունն է հայտնում դրանց իրականացման հարցում»,- ասաց փոխնախարարը:
Ատոմ Ջանջուղազյանը նշեց, որ նախատեսվում է 3,85 մլրդ դրամ հատկացնել «Հյուսիս- Հարավ» ճանապարհային միջանցքի 3-րդ տրանշի համար: Նախատեսվող գումարից 3,2 մլրդ դրամը կլինի վարկային միջոցներից, մնացածը կլինեն համաֆինանսավորման միջոցներ: