Ադրբեջանական զինուժը կրակոցներ է արձակել հայ-ադրբեջանական սահմանի հյուսիս-արեւելյան հատվածում: Պաշտպանության նախարարի մամուլի խոսնակը տեղեկացրել է, որ հակառակորդը կրակոցներ է արձակել նաեւ գյուղերի ուղղությամբ: Սահմանային միջադեպի հետեւանքով, բարեբախտաբար, ոչ ոք չի տուժել:
Վարչապետ Կարեն Կարապետյանն այսօր լրագրողների հետ հանդիպել ու ամփոփել է կառավարության գործունեությունը: Վարչապետի նախաբանը հակիրճ է եղել՝ հիմնականում թվերի տեսքով: Տարբեր գերատեսչությունների ղեկավարներն ավելի վաղ արդեն մանրամասն ամփոփել էին իրենց ոլորտների տվյալները: Կարեն Կարապետյանը եւս մեկ անգամ ներկայացրել է, թե այս տարվա ութ ամիսներին որ ոլորտներում ենք աճ ունեցել, որտեղ խնդիրներ ու անելիքներ կան: Վարչապետը նաեւ փորձել է կանխատեսել լրագրողների մի շարք հարցեր ու նախապես թվեր տրամադրել: Ըստ նրա՝ լայն սպառման ապրանքների ներկրմամբ Հայաստանի բնակչության բարեկեցությունը նկատելի է: Ընդգծել է հատկապես մեկ ցուցանիշ. մարդատար մեքենաների ներկրումը 119 տոկոսով աճել է:
2017 թվականի համար կառավարությունը 834 մլն դոլարի ներդրումային ծրագրեր է կանխատեսել: Առաջին 8 ամիսների տվյալներով՝ կատարողականը կազմել է 45 տոկոս: Իսկ մինչեւ տարեվերջ դեռ ժամանակ կա, եւ Կարեն Կարապետյանը հույս ունի, որ կկարողանան ամբողջական կատարված ցուցանիշ ներկայացնել: Լրագրողի հարցին, թե որքանով ճիշտ է այս ցուցանիշում ներառել նաեւ վարկերը, վարչապետն արձագանքել է. իրենք խոսում են ոչ թե ներդրումների, այլ ներդրումային ծրագրերի մասին, որոնք, այո, նաեւ վարկային միջոցներն են ներառում: Վարչապետը նաեւ համոզված է, որ բիզնես միջավայրը Հայաստանում բարելավվել է: Այս մասին են վկայում միջազգային վարկանիշերը, իր եւ կառավարության անդամների հետ հանդիպումներում այդ մասին խոսում են նաեւ գործարարները:
Ինչպես եւ սպասվում էր՝ լրագրողները հարցրել են նաեւ, թե 2018 թվականի ապրիլից հետո ով է լինելու վարչապետի թեկնածուն: Տեւական ժամանակ է՝ լուրեր են շրջանառվում, որ վարչապետ է դառնալու Սերժ Սարգսյանը, իսկ Կարեն Կարապետյանը ստանձնելու է առաջին փոխվարչապետի պաշտոնը: Պատասխանը, կարծես, չի բավարարել լրագրողներին: Հարցը եւս մեկ անգամ է հնչել: Կարեն Կարապետյանին, սա, կարծես, նյարդայնացրել է. նա դժգոհել է երեւակայության պակասից: Կարեն Կարապետյանին հիշեցրել են, որ մեկ տարի առաջ վարչապետի պաշտոնը ստանձնելուց հետո արձանագրել է՝ Հայաստանի տնտեսությունը ծայրահեղ ծանր վիճակում է: Հետո հետաքրքրվել են, թե ինչպե՞ս որոշեց անդամագրվել տնտեսությունը այդ վիճակին հասցրած Հանրապետական կուսակցությանը:
Ամիսներ առաջ Զարուհի Փոստանջյանը հայտարարել էր, որ քաղաքական գործիչները «Մոնումենտի» մոտ կանաչ գոտիների հաշվին առանձնատներ են կառուցել: Այդտեղ տարիներ առաջ հողատարածք է գնել նաեւ վարչապետի եղբայրը, բայց այդ ժամանակ արդեն, Կարապետյանի հավաստմամբ, այնտեղ անտառ չի եղել: 2014 թվականին Կարապետյաններն այդ տարածքում տուն են կառուցել, բայց վարչապետն այնտեղ չի բնակվում:
Հավելենք, որ օրվա երկրորդ կեսին արդեն Կարեն Կարապետյանի գլխավորած պատվիրակությունը մեկնել է Տաշքենդ: Այստեղ կայանալու է ԱՊՀ կառավարությունների ղեկավարների խորհրդի հերթական նիստը: Օրակարգում կազմակերպության անդամ պետություններում տնտեսական եւ այլ ոլորտներում համագործակցությանը վերաբերող հարցեր են:
Շուրջ երկու ամիս անհետ կորած համարվողներին այսօր մահացած են գտել: Երեւան-Սեւան ավտոճանապարհի դաշտամիջյան հատվածում երկու դի են հայտնաբերել՝ տղամարդու եւ կնոջ: Մարմինները կապված են եղել պոլիէթիլենային տոպրակով: Շուրջ մեկ ժամ է պահանջվել, մինչեւ ոստիկաններն ու քննիչները կարողացել են դիերի վրայից հեռացնել հողաշերտը: Պարզվել է, որ նրանք Հրազդանի բնակիչներ 53-ամյա Սամվել Ալիխանյանը եւ 56-ամյա Վարդուհի Սիմոնյանն են: Նրանք այս տարվա սեպտեմբերի 18-ից որպես անհետ կորած որոնվում էին: Այդ վայրում նաեւ երկաթե ձող են գտել, որն առգրավել են:
Երեւանում նոյեմբերի 1-ի երեկոյան ավտովթար-դանակահարություն է տեղի ունեցել: Արշակունյաց պողոտայում բախվել են Opel մակնիշի մեքենան եւ առանց համարանիշի մոտոցիկլետ, որից հետո վերջինը բախվել է նաեւ ճանապարհի թույլատրելի հատվածում կայանված մեկ այլ Opel-ի: Բախումից հետո մոտոցիկլետից ընկած 2 անձանցից մեկը դանակահարել է իրենց բախված Opel-ի վարորդին: 3 մարդ վնասվածքներով հիվանդանոց է տեղափոխվել:
Համացանցում զարհուրելի կադրեր են պտտվում Ռուսաստանում տեղի ունեցած դեպքից: Մոսկվայում Անդրեյ անունով մի ուսանող սպանել է իր դասախոսին: Դեպքը տեղի է ունեցել դասամիջոցի ժամանակ. երիտասարդը դանակով մահացու հարված է հասցրել 44-ամյա դասախոսին, լուսանկարվել, այնուհետեւ ինքնասպան եղել՝ այդ ամենը տեսանկարահանելով ու տարածելով սոցցանցում: Ուսանողի արարքի պատճառը դեռեւս հայտնի չէ: Դեպքի առիթով քրեական գործ է հարուցվել:
Երեւանում այսօր բալենի է ծաղկել: Անցյալ տարի այս օրը մայրաքաղաքի բնակիչներն անակնկալի եկան՝ վաղ առավոտյան տեսնելով ձյունով ծածկված փողոցները, իսկ այս տարի եղանակն այնքան տաք է, որ ծառ է ծաղկում: «Հիդրոմետ» ծառայության օդերեւութաբանության կենտրոնի պետը, սակայն, վստահեցնում է, որ այս օրերի տաք եղանակն աննախադեպ չէ, ջերմաստիճանը նորմայի սահմաններում է: Հակառակը, անոմալ ցուրտ էր նախորդ տարի: Իսկ աշնան այս ամսին ծառերի ծաղկման դեպքեր, Գագիկ Սուրենյանի խոսքով, նախկինում էլ եղել են:
Նոյեմբերի 2-ին դոլարը թանկացել է եւս շուրջ մեկ դրամով: Արդյունքում դոլարի փոխարժեքն այսօր կազմել է 483 դրամ, եվրոյինը՝ 563, ռուբլունը՝ 8 դրամ 32 լումա, ֆունտինը՝ 640 դրամ:
Նոյեմբերի 3-7-ը հանրապետությունում սպասվում է առանց տեղումների եղանակ: Օդի ջերմաստիճանը 3-4 աստիճանով կբարձրանա: Երեւանում նույնպես տեղումներ չեն սպասվում: Մայրաքաղաքում գիշերը կդիտվի +1+3, ցերեկը՝ +16+18 աստիճան տաքություն: