Հայկական կողմը պատրաստ է Ադրբեջանի հետ ցանկացած, իսկապես փոխզիջմային որոշում քննարկել: Այս մասին նոյեմբերի 3-ին՝ խորհրդարանում լրագրողների հետ զրույցում, հայտարարել է փոխարտգործնախարար Շավարշ Քոչարյանը:
Նրա խոսքով՝ եթե Ադրբեջանը «խելքի գա», եւ որոշումը իսկապես փոխզիջումային լինի, ապա, իհարկե, բանակցությունների համար դա բավարար է: Այժմ, սակայն, նման նշաններ չկան: Սա շատ լավ հասկանում են ԵԱՀԿ Մինսկի խմբի միջնորդները: «Մինչեւ այդ ես մազոխիզմ եմ համարում միակողմանի զիջումների մասին խոսակցությունները», - ավելացրել է Քոչարյանը:
Հիշեցնենք, որ մի քանի օր առաջ նախագահ Սերժ Սարգսյանը, իշխող Հանրապետական կուսակցության «Անդրանիկ Մարգարյան» քաղաքական դպրոցում ելույթ ունենալով (Ժնեւում Իլհամ Ալիեւի հետ հանդիպումից 10 օր հետո), ասել է, որ Ղարաբաղի վերաբերյալ որոշումը ցավալի կլինի եւ առանց փոխզիջումների դրան չի կարելի հասնել:
