Մահացել է 1999 թվականի հոկտեմբերի 27-ին ԱԺ-ում իրականացված ահաբեկչության գործով դատապարտված Էդուարդ Գրիգորյանը: Բժիշկ Գրիգորյանն ու եւս 5 անձ ահաբեկչության համար դատապարտվել էին ցմահ, եւս մեկը՝ 14 տարվա ազատազրկման: Էդուարդ Գրիգորյանը գիշերը սրտի շրջանում սուր ցավեր է ունեցել եւ տեղափոխվել հիվանդանոց, որտեղ կենսաբանական մահ են գրանցել: 4 տարի առաջ նա սրտի փականի վիրահատության է ենթարկվել: Նշենք, որ սա այս գործով մեղադրվողների եւ դատապարտվածների շրջանում 4-րդ մահն է: 2014 թվականի ապրիլին մահացել է Նաիրի եւ Կարեն Հունանյանների քեռին՝ Վռամ Գալստյանը. պաշտոնական վարկածով՝ նա ինքնասպան է եղել մենախցում: 14 տարվա ազատազրկման դատապարտված Համլետ Ստեփանյանը մահացել է 2010թ. մայիսին՝ սրտի կաթվածից: Իսկ գործով մեղադրյալներից Նորայր Եղիազարյանը մահացել է մինչ դատավճռի հրապարակումը. նա էլեկտրահարվել է «Նուբարաշեն» ՔԿՀ-ի իր խցում:
Կիրակի՝ նոյեմբերի 5-ին հանրապետության 49 համայնքներում տեղի կունենան ՏԻՄ ընտրություններ: Իշխող Հանրապետական կուսակցությունը թեկնածուներ է առաջադրել համայնքների գերակշիռ մասում, «Ելք» դաշինքը որեւէ համայնքում թեկնածու չունի, Կոտայքի համայնքներում հիմնականում ԲՀԿ-ականներ են առաջադրվել, իսկ ՀՅԴ-ն թեկնածուներ ունի հիմնականում Շիրակում: Քիչ թե շատ ինտրիգային համարվող Արարատ ու Արտաշատ քաղաքներում քաղաքապետի թեկնածուի համար կպայքարեն միայն ՀՀԿ-ական թեկնածուները: Իրավիճակը լարված է Գեղարքունիքի մարզի Ճամբարակ համայնքում. քաղաքապետի պաշտոնի համար միմյանց դեմ պայքարելու են գործող համայնքապետ, հանրապետական Յուրիկ Ավալյանը եւ անկուսակցական, ինքնաառաջադրված Վազգեն Ադամյանը: Ճամբարակում տարածված տեղեկությունների համաձայն՝ գործող համայնքապետը փորձել է սպառնալիքներով մրցակցին ստիպել հանել թեկնածությունը, սակայն վերջինը որոշել է պայքարել: Լուրեր են պտտվում նաեւ, որ նրան աջակցում են գործող քաղաքապետի նախկին թիմակիցները:
2018 թվականի պետբյուջեի նախագծի քննարկումներն Ազգային ժողովում շարունակվում են: Պաշտպանության եւ անվտանգության ու ֆինանսավարկային եւ բյուջետային հարցերի մշտական հանձնաժողովների համատեղ նիստն այսօր դռնփակ է անցկացվել: Այսօր քննարկվել է նաեւ բյուջեի՝ սփյուռքի եւ արտաքին գործերի նախարարություններին վերաբերող մասը: Խորհրդարան եկած Շավարշ Քոչարյանից լրագրողները հարցրել են, թե նախագահ Սերժ Սարգսյանն ինչո՞ւ է ԵՄ գագաթնաժողովից առաջ, որի ընթացքում նախատեսվում է Հայաստան-Եվրամիություն նոր համաձայնագրի ստորագրումը, Մոսկվա մեկնում:
Օրերս նախագահ Սերժ Սարգսյանն ասել էր, որ Արցախի հարցով վերջնական որոշման հնարավոր չի լինի հասնել առանց փոխզիջումների: Շավարշ Քոչարյանը վերահաստատել է. հայկական կողմը պատրաստ է Ադրբեջանի հետ ցանկացած, իսկապես փոխզիջումային որոշում քննարկել: Բայց, նրա խոսքով, Բաքուն պատրաստ չէ դրան: Հրանուշ Հակոբյանին էլ լրագրողները հարցրել են, թե ինչո՞ւ են սփյուռքահայ գործարարներն անդադար բողոքում Հայաստանում բիզնես հիմնելու եւ ներդրումներ անելու դժվարություններից: Սփյուռքի նախարարը վստահեցրել է, որ դժգոհողներն ավելի քիչ են, քան հաջողված բիզնեսի օրինակները: Համոզված է, որ ով ուզում է գործ անել, անպայման կհաջողի:
Սերժ Թանկյանը Հայաստանի բնակիչներին կոչ է արել հեռու մնալ ամերիկյան Monsanto ընկերության արտադրանքից: Աշխարհահռչակ ռոք երաժիշտը Facebook-ում գրել է, որ Monsanto-ի սփրեյները թունավորել են շրջակա միջավայրն ու հանգեցրել մեղուների կտրուկ ոչնչացման, իսկ ընկերության՝ գենետիկորեն մոդիֆիկացված արտադրանքը մաքուր օրգանական մթերքի վերջն է նշանակում:
Օրերս ԱՄՆ դեսպանատունը Երեւանում ներկայացրել է Valmont եւ Monsanto ընկերությունների գործունեությունը: ԱՊՀ տարածաշրջանում Monsanto-ի առեւտրային մենեջեր Ալեքսանդր Զվյագինցեւը, սակայն, վստահեցնում է, որ ընկերությունը հայ գործընկերներին չի առաջարկելու աշխատել գենետեկորեն մոդիֆիկացված արտադրանքով:
Այսօր հայտարարություն է տարածել նաեւ գյուղնախարարությունը՝ նշելով, որ իրենք չեն համագործակցում Monsanto ընկերության հետ: Հայաստանում, հայտարարության համաձայն, հետաքրքրված են միայն օրգանական գյուղատնտեսության մեջ կիրառվող ապրանքատեսականիով:
Նշենք, որ ամերիկյան Monsanto-ն հայտնի է, մասնավորապես, գենետիկորեն մոդիֆիկացված սերմերի արտադրությամբ: 1901 թվականին ստեղծված ընկերությունը սկզբում միայն քիմիական արտադրանք է թողարկել. նախ՝ սախարին Կոկա Կոլայի համար, իսկ հետո հերթը հասել է կոֆեինին եւ վանիլինին: Հետագայում այն ընդլայնել է քիմիական արտադրության ոլորտում գործունեությունը, իսկ գենետիկորեն մոդիֆիկացված առաջին գյուղատնտեսական կուլտուրաները շուկա է հանել 1996 թվականին: Տարիների ընթացքում Monsanto-ն սերմերի արտադրությամբ զբաղվող 50 ընկերություն է գնել: Ամերիկյան ընկերությանը Երկիր մոլորակի թշնամի են համարում: Բազմաթիվ երկրներում դրա գործունեության դեմ բողոքի ցույցեր են տեղի ունեցել, մարդիկ իրենց կառավարություններից պահանջել են արգելել երկրում ընկերության գործունեությունը:
Աշխարհի խոշորագույն քաղաքներում այսօր մեկնարկել է Apple-ի նոր՝ iPhone X սմարթֆոնի վաճառքը: Հիմնական մոդելը 999 դոլար արժե: iPhone X-ն առաջարկվում է երկու գույնով՝ «մոխրագույն» եւ «մոխրագույն տիեզերք»: Ամերիկյան ընկերության արտադրանքի սիրահարների շրջանում սա մեծ իրարանցում է առաջացրել: Պատճառն այն է, որ գաջեթների քանակությունը խանութներում սահմանափակ է: Շատերը նույնիսկ նախորդ օրվանից են հերթ կանգնել Apple-ի խանութ-սրահների առջեւ: Իսկ Մոսկվայում կայքերից մեկում նույնիսկ iPhone X-ի հերթի տեղերի վաճառքի մասին հայտարարություն է հրապարակվել. «լավ» տեղն այստեղ մինչեւ 125 հազար ռուբլի է արժեցել, այն դեպքում, երբ սմարթֆոնի գինը սկսվում է 79.900 ռուբլուց:
Դոլարն ու եվրոն շարունակում են ամրապնդել դիրքերը: Նոյեմբերի 3-ին դոլարի փոխարժեքը կազմել է 484 դրամ, եվրոյինը՝ 564, ռուբլունը՝ 8 դրամ 28 լումա, ֆունտինը՝ 632 դրամ:
Նոյեմբերի 4-7-ը հանրապետությունում սպասվում է առանց տեղումների եղանակ: Օդի ջերմաստիճանը 3-5 աստիճանով կբարձրանա, իսկ հետո 2-3 աստիճանով կնվազի: Երեւանում նույնպես տեղումներ չեն սպասվում: Մայրաքաղաքում գիշերը կդիտվի -1+1, ցերեկը՝ +14+16 աստիճան տաքություն: