Արցախի Հանրապետության պետական նախարար Արայիկ Հարությունյանը նոյեմբերի 4-ին ընդունել է ՀՀ մի շարք առաջատար բանկերի ղեկավարների՝ ՀՀ կենտրոնական բանկի նախագահ Արթուր Ջավադյանի գլխավորությամբ:
Արցախի կառավարությունից NEWS.am-ին հայտնում են, որ Ա. Հարությունյանը, կարեւորելով բանկային համակարգի պատասխանատուների այցն Արցախ, համոզմունք է հայտնել, որ այն կխթանի բանկերի եւ Արցախի կառավարության միջեւ համագործակցության զարգացումը: Նա նաեւ ընդգծել է ՀՀ կենտրոնական բանկի ակտիվ դերակատարումն Արցախի տնտեսության զարգացման գործում:
ՀՀ կենտրոնական բանկի նախագահ Արթուր Ջավադյանը, շնորհակալություն հայտնելով ընդունելության համար, մասնավորապես, նշել է. «Այցի բոլոր մասնակիցները տպավորված են Արցախի գրանցած նվաճումներով, կազմակերպվածությամբ եւ ներուժով: Վստահեցնում ենք Ձեզ, որ անձամբ ես եւ իմ գործընկերները պատրաստ ենք հնարավորինս աջակցել Արցախի տնտեսության զարգացմանը»:
Պետական նախարարը հակիրճ ներկայացրել է կառավարության վերջին տասը տարիների գործունեության հիմնական արդյունքները եւ պետական աջակցող քաղաքականության փիլիսոփայությունը: Անդրադառնալով տնտեսական զարգացմանն ուղղված նախընթաց ծրագրերին եւ արդյունքներին՝ Ա. Հարությունյանը, մասնավորապես, ասել է. «Վերջին 10 տարում Արցախում գրանցվել է տարեկան շուրջ 10 տոկոս ՀՆԱ աճ, ինչը հնարավոր է դարձել բոլոր առաջնահերթ ոլորտներում իրականացված ծրագրերի շնորհիվ: Եթե ուշադրություն դարձնեք ՀՆԱ-ի կառուցվածքի փոփոխության դինամիկային՝ կնկատեք, որ մեզ հաջողվել է զգալիորեն նվազեցնել հանքարդյունաբերության տեսակարար կշիռը եւ՛ ՀՆԱ-ի, եւ՛ պետական եկամուտների կառուցվածքում: Դա իրագործել ենք մնացած ոլորտներում զարգացման առաջանցիկ տեմպեր ապահովելու միջոցով՝ հենվելով հատկապես էներգետիկայի, գյուղատնտեսության եւ ծառայությունների բնագավառների վրա»:
Ա. Հարությունյանը հատուկ անդրադարձ է կատարել բնակարանաշինության ծրագրերին եւ պետական աջակցության մեխանիզմներին: Նա կարեւորել է բանկային համակարգի մասնակցությունն այդ ոլորտում՝ վստահեցնելով, որ կառավարությունը պատրաստ է հնարավորինս նվազեցնել բնագավառի ռիսկայնությունը՝ հաշվի առնելով բնակարանաշինության ռազմավարական նշանակությունն Արցախի համար:
Հանդիպման ընթացքում ներկայացվել են նաեւ «Գյուղի եւ գյուղատնտեսության աջակցության հիմնադրամի» եւ «Արցախի ներդրումային հիմնադրամի» գործունեության հիմնական ուղղությունները, մեխանիզմներն ու արդյունքները: