Հայաստանը եւ Հնդկաստանը մտադիր են սկսել երկրների միջեւ վիզային ռեժիմի պարզեցումը: Հայաստանի նախագահ Սերժ Սարգսյանն այս մասին նշել է հնդկական DD News-ի հետ հարցազրույցում:
«Հայ եւ հնդիկ ձեռնարկատերերի միջեւ շփումները դյուրացնելու, ինչպես նաեւ մարդկանց միջեւ շփումների եւ տուրիզմի զարգացման համար մենք պատրաստվում ենք սկսել երկրների միջեւ վիզային ռեժիմի պարզեցումը:
Ինչ վերաբերում է ուղիղ չվերթների բացմանը, նախագահը նշել է, որ դա կախված է զբոսաշրջիկների թվից: «Մենք որոշակի քայլեր ենք ձեռնարկել: Մենք ազատականացրել ենք օդային տարածքը, եւ հնդկական ցանկացած ընկերություն կարող է ոչ միայն ուղիղ չվերթներ հաստատել, այլեւ մեր օդային տարածքն օգտագործել եվրոպական երկրներ, ՌԴ կամ այլ ուղղություններով թռչելու համար: Մենք պետք է հետագա աշխատանք կատարենք, որ Հայաստանը Հնդկաստանում ավելի ճանաչելի դառնա»,- ընդգծել է ՀՀ նախագահը՝ հավելելով, որ վերջերս Հայաստան էին այցելել հնդկական տուրիստական ընկերությունների ներկայացուցիչները:
Դրանից զատը, նախագահը հավելել է, որ Հայաստանում արդեն մեկ հնդկական ֆիլմ է նկարահանվել, եւ երկրորդի նկարահանման նախապատրաստական աշխատանքներ են ընթանում, ինչը հնդիկ ժողովրդին Հայաստանի գեղեցկությունը ցույց տալու լավ հնարավորություն է:
