«Սասնա ծռեր» զինված խմբի 10 անդամի գործով դատական հերթական նիստն այսօր՝ նոյեմբերի 6-ին, հետաձգվեց, քանի որ պաշտպաններից շատերը չէին ներկայացել:
Երեւանի Ավան եւ Նոր Նորք վարչական շրջանների ընդհանուր իրավասության դատարանում դեռեւս նախորդ նիստին պաշտպանները հայտարարել էին, որ չեն կարող շաբաթական երկու անգամ գալ այս գործով նիստերին: Նրանք պահանջում էին շաբաթական մեկ անգամ՝ չորեքշաբթի, նիստերն անցկացնել, սակայն նախագահող դատավոր Մեսրոպ Մակյանը չհամաձայնվեց եւ նիստ նշանակեց երկուշաբթի եւ չորեքշաբթի օրերին: Այսօր արդեն նիստի մեկնարկին պարզ դարձավ, որ պաշտպաններից գալ կարողացել են միայն երեքը՝ Հայկ Ալումյան, Մուշեղ Շուշանյան եւ Ինեսսա Պետրոսյան:
Դատավոր Մեսրոպ Մակյանը որոշեց նիստի նախապատրաստական փուլն ամբաստանյալ Սմբատ Բարսեղյանի եւ նրա պաշտպան Հայկ Ալումյանի մասով շարունակել: Ի դեպ, սա առաջին նիստն էր, որ Հայկ Ալումյանին առանց խուզարկելու թույլ տվեցին մտնել դատարան: Նախորդ նիստերին Ալումյանին ցանկանում էին խուզարկել, նա հրաժարվում էր եւ նրան արգելվում էր մտնել ներս:
Այսօր Հայկ Ալումյանը նախ դատավորից հետաքրքրվեց՝ արդյոք իսկապես համակարգիչն է պատահականության սկզբունքով գործը մակագրել իրեն, թե այնտեղ այլ ֆակտորներ են գործել:
«Բացի դրանից, հարգելի դատարան, Դուք Ձեր կամքո՞վ եք գործուղվել Էրեբունի եւ Նուբարաշեն վարչական շրջանների ընդհանուր իրավասության դատարան»,- հետաքրքրվեց պաշտպանը:
Մեսրոպ Մակյանը նախ նշեց, որ այս փուլում պաշտպանը չի կարող հարցադրում անել դատավորին, սակայն, այնուամենայնիվ, որոշեց պատասխանել. «Պատահականության սկզբունքով է այն ինձ մակագրվել, իսկ գործուղումը հնարավոր է միայն դատավորի համաձայնության դեպքում, հետեւաբար, ես իմ համաձայնությունը տվել եմ, Դատարանների նախագահների խորհուրդն էլ որոշումը կայացրել»,- ասաց դատավորը:
Հիշեցնենք, որ լուրեր են շրջանառվում, որ հենց այս գործը քննելու համար են Մեսրոպ Մակյանին Կենտրոն եւ Նորք Մարաշ վարչական շրջանների ընդհանուր իրավասության դատարանից գործուղել:
Հայկ Ալումյանը հայտարարեց, որ այս պահին դատավորին ինքնաբացարկ հայտնելու միջնորդություն չունի, սակայն հաջորդ դատական նիստին պատրաստվում է նման միջնորդությամբ հանդես գալ: Այնուհետեւ Մակյանը վերացրեց Սմբատ Բարսեղյանի տեսակցությունների եւ հեռախոսազրույցների արգելքը:
Նշենք, որ այսօր նիստի մեկնարկին Արայիկ Խանդոյանը վիճեց դատավորի հետ՝ պահանջելով իրենց ամբաստանյալներ չկոչել: Խանդոյանը բորբոքվեց, երբ նիստերի քարտուղարն ընթերցում էր, թե ամբաստանյալներից ովքեր են ներկայացել դատարան:
«Մենք ազատամարտիկներ ենք, ամբաստանյալը Դուք եք... ամբաստանյալը դու ես»,- ասաց «Միայնակ գայլը»՝ դիմելով դատավորին եւ նիստերի քարտուղարին:
Մեսրոպ Մակյանը նախազգուշացում կիրառեց Արայիկ Խանդոյանի նկատմամբ:
Դատական նիստն այսօր հետաձգվեց եւ նշանակվեց նոյեմբերի 8-ին: