«Սասնա Ծռերից» Վարուժան Ավետիսյանը «Սասնա ծռերի» անունից՝ հանդես է եկել հայտարարությամբ, որտեղ իրենց զորակցությունն են հայտնում փաստաբան Տիգրան Եգորյանին:
Հայտարարությունում ասվում է.
«Օրեր առաջ Կենտրոն հեռուստաընկերության եթերից Հաց բերող Արթուր Սարգսյանի եւ Սասնա Ծռեր խմբավորման մի խումբ անդամների պաշտպան, փաստաբան Տիգրան Եգորյանի վերաբերյալ ՀՀԿ ներկայացուցիչ Միհրան Հակոբյանի հնչեցրած անհիմն եւ անբարո արտահայտությունները վերջնականապես հաստատեցին, որ Տիգրան Եգորյանի նկատմամբ շուրջ մեկ տարի շարունակվող պարբերական հալածանքի պատվիրատուն եւ համակարգողը պետությունը զավթած հանցավոր վարչախումբն է։
Այս հալածանքի պատճառն այն է, որ Տիգրան Եգորյանը եւ քաղաքական գործերով մյուս պաշտպանները հանուն Հայաստանի ինքնիշխանության, անվտանգության ու ժողովրդավարության, քաղաքացիների իրավունքների ու ազատությունների պայքարի յուրօրինակ առաջամարտիկներ են։
Ոչ միայն մենք՝ Սասնա Ծռեր խմբավորման անդամներս, այլեւ ամբողջ ժողովուրդն է տեսնում եւ գնահատում նրանց անշահախնդիր ու ազնիվ գործելակերպը, արդարության ու իրավունքի գերակայության հասնելու նրանց ջանադիր նկրտումը։
Սասնա Ծռեր խմբավորման լիազորությամբ մեր զորակցությունն եմ հայտնում փաստաբան Տիգրան Եգորյանին՝ իր մասնագիտական բարեխղճության եւ քաղաքացիական արիության համար։
Համոզված ենք, որ համընդհանուր ատելության առարկա դարձած հանցավոր վարչախումբը չի կարողանալու սասանել Տիգրան Եգորյանի վաստակած հանրային վստահությունը, առավել եւս՝ ի վիճակի չէ կոտրել նրա կամքն ու հաղթահարել նրա համառությունը։
