Նոյեմբերի 4-ին Արցախի զորամասերից մեկում հակատանկային նռնակի պայթյունի հետեւանքով մեկ զինծառայող է զոհվել, երկուսը՝ վիրավորվել: Մահացու վիրավորում է ստացել 20-ամյա Հրանտ Մանգասարյանը, իսկ Գեւորգ Հյուսնունցը եւ Սերգեյ Ալումյանը բեկորային վիրավորումներ են ստացել: Նախնական տվյալներով՝ կատարվածն անփութության հետեւանք է: Հրանտ Մանգասարյանը Սպիտակի շրջանից էր, սակայն ընտանիքի հետ Երեւանում էր ապրում: Նա Մանգասարյանների միակ որդին էր, 5 քույր ունի: Հրանտն ապրիլյան պատերազմի մասնակից էր, երեք ամսից զորացրվելու էր:
Բեկորային վիրավորում ստացած Սերգեյ Ալումյանը Ստեփանակերտի հոսպիտալում վիրահատվել է, այնուհետեւ Երեւան տեղափոխվել: Նրա վիճակը ծայրահեղ ծանր է: Վիրավոր զինծառայողն անգիտակից վիճակում է, դեմքի ու ձեռքերի շրջանում բեկորային վնասվածքներ ունի, ծնոտի կոտրվածք, մատներից մի քանիսն անդամահատել են: Մյուս վիրավորը՝ Գեւորգ Հյուսնունցը, շարունակում է մնալ Ստեփանակերտի հոսպիտալում: Բժիշկները նրա վիճակը բավարար են գնահատում:
Նոյեմբերի 5-ին Հայաստանի 69 համայնքներում ՏԻՄ ընտրություններ անցկացվեցին. քվեարկությանը մասնակցել է ընտրելու իրավունք ունեցողների ընդամենը 50.06%-ը: Իշխող ՀՀԿ-ն հաղթել է 37, ԲՀԿ-ն՝ 3, ՀՅԴ-ն՝ 2 համայնքներում, եւս 8 համայնք կղեկավարեն անկուսակցականները: Ընդդիմադիր «Ելք» դաշինքն այս ընտրություններին չի մասնակցել: ՀՅԴ-ն հաղթել է Շիրակում, որտեղ մարզպետը դաշնակցական է, ԲՀԿ-ն՝ Կոտայքում, որտեղ Գագիկ Ծառուկյանը մեծ հեղինակություն եւ ազդեցություն ունի: Գորիսում ջախջախիչ հաղթանակ է տարել գործարար Առուշ Առուշանյանը: Նշենք, որ նա նաեւ ԱԺ պատգամավոր էր ընտրվել, բայց սկանդալային մի միջադեպի պատճառով վայր էր դրել մանդատը:
Ինտրիգներ էին սպասվում Արտաշատում, սակայն նախկին վարչապետ Հովիկ Աբրահամյանի մերձավոր շրջապատից այստեղ թեկնածու այդպես էլ չառաջադրվեց: ԿԸՀ-ի տվյալներով՝ Արտաշատի քաղաքապետ է ընտրվել հանրապետական Կարեն Բենիամինյանը: Ավշար համայնքն էլ կղեկավարի Արարատի մարզպետ Արամայիս Գրիգորյանի եւ ԱԺ պատգամավոր Արայիկ Գրիգորյանի եղբայրը՝ Սուրիկ Գրիգորյանը: Իսկ Գեղարքունիքի մարզի Ճամբարակ քաղաքում քաղաքապետ են ընտրել ԱԺ ընտրություններում քվեարկության գաղտնիությունը խախտելու համար դատապարտված եւ լրագրողի հայհոյած Վազգեն Ադամյանին: Իսկ ընդհանուր առմամբ այս ընտրությունները հանգիստ մթնոլորտում են անցել. ընտրախախտման 47 դեպք է արձանագրվել, 13-ով նախաքննություն է կատարվում:
Ազգային ժողովում 2018 թվականի պետբյուջեի նախագծի քննարկումներն այսօր շարունակվել են: Առողջապահության ոլորտի ծախսերը 5.8 մլրդ դրամով կրճատվել են: Պատգամավորները սա անտրամաբանական են համարում: Նիկոլ Փաշինյանին ամենաշատն անհանգստացրել է անպտուղ զույգերի օգնության ծրագրի փակումը: Կարծում է, որ այն ոչ միայն պետք էր չփակել, այլ կրկնապատկել ու եռապատկել ֆինանսավորումը: Պատգամավորը կրկին հիշեցրել է նաեւ, որ թեեւ մի քանի տարի է՝ հայտարարում ենք, որ սրտի ստենտավորումը պետության հաշվին է արվում, բայց գործնականում խնդիրներ են ծագում: Լեւոն Ալթունյանը հակադարձել է. սրտի անվճար ստենտավորում նախատեսված է միայն բնակչության որոշակի խավերի, այն էլ՝ տարեկան 1500 հիվանդի համար:
Բյուջե-2018-ի նախագծով 362 մլն դրամով կրճատվել են նաեւ սոցիալական պաշտպանության ոլորտին տրամադրվող ծախսերը: Արտեմ Ասատրյանից Նիկոլ Փաշինյանը հետաքրքրվել է, թե ինչ մեսիջ ենք ուղարկում քաղաքացիներին, եթե կենսաթոշակները, ընտանեկան նպաստներն ու նվազագույն աշխատավարձերը չեն բարձրանում, բայց բյուջեի նախագծում գնաճի որոշակի ցուցանիշ ենք նախատեսում:
Վարդան Բոստանջյանն մտահոգված է մշակույթի ոլորտին հատկացվող աննշան միջոցների առիթով: Հասկանում է, որ բյուջեում փող չկա, բայց տարակուսում է, թե ինչպես են մշակույթի օջախները բավարարվելու, իր բնորոշմամբ՝ ողորմելի միջոցներով: Սպորտի եւ երիտասարդության հարցերի նախարարության բյուջեն Հրաչ Ռոստոմյանը ներկայացրել է գրեթե դատարկ դահլիճում: Նախարարը նույնիսկ հեգնել է՝ պատգամավորներն այնքան շատ են, որ դժվար կլինի ներկայացնել: Հաջորդ զեկուցողին դահլիճում ներկա մի քանի պատգամավորներն ու լրագրողները ստիպված են եղել սպասել. Հանրային հեռուստառադիոընկերության խորհրդի նախագահի տեղակալ Ստեփան Զաքարյանն ուշացել էր: Վարդան Բոստանջյանը կատակել է. բյուջեն կրճատե՞նք:
Ինդիանայի նահանգապետ Էրիկ Ջ. Հոլքոմբը հանդես է եկել հայտարարությամբ, որը դատապարտում է 1915թ․ Օսմանյան կայսրությունում երեք միլիոն հայերի, հույների, ասորիների ու սիրիացիների սպանությունը։ Այսպիսով՝ Ինդիանան դարձել է ամերիկյան 48-րդ նահանգը, որը ճանաչել է Հայոց ցեղասպանությունը: Փաստաթղթում նշվում է, որ այդ կերպ օգնում են պաշտպանել պատմական հիշողությունը, այնպես անել, որ նման վայրագություններ այլեւս չկրկնվեն: Ինդիանայի նահանգապետը նաեւ նոյեմբերի 6-12-ը «Հայաստանի շաբաթ» է հայտարարել։
Ամերիկյան Թեխասում հրաձգություն է տեղի ունեցել: Սաթերլենդ Սփրինգս քաղաքում ինքնաձիգով զինված անհայտ անձը՝ սպիտակամորթ երիտասարդ, ոտքից գլուխ սեւ հագուստով եւ զրահաբաճկոնով, կրակ է բացել բապտիստական եկեղեցում: Նախնական տվյալներով՝ 26 մարդ է զոհվել, մի քանի տասնյակ վիրավոր կա: Որոշ տեղեկություններով՝ զոհերի թվում երեխաներ կան: Ոստիկանները գնդակահարել են հրաձիգին: Լրատվամիջոցների փոխանցմամբ՝ նա Դեւին Պատրիկ Քելլին է, ում վտարել են ամերիկյան ՌՕՈւ-ից: Այս լուրը, սակայն, պաշտոնապես դեռ չի հաստատվել:
Նախագահ Դոնալդ Թրամփը կարգադրել է 4 օրով՝ մինչեւ նոյեմբերի 9-ը, բոլոր հաստատություններից իջեցնել ԱՄՆ դրոշները՝ ի հիշատակ հրաձգության զոհերի: Կիջեցվեն նաեւ արտերկրում ամերիկյան դեսպանատների եւ ներկայացուցչությունների դրոշները: Չնայած ողբերգությանը՝ ԱՄՆ նախագահը հրազենի վաճառքը խստացնելու անհրաժեշտություն չի տեսնում:
Լրագրողական հետաքննության միջազգային կոնսորցիումը փաստաթղթերի նոր փաթեթ է հրապարակել քաղաքական գործիչների, գործարարների եւ աստղերի կոռուպցիոն մեխանիզմների վերաբերյալ: Նոր բացահայտումը «Դրախտային թղթապանակ» անվանումն է ստացել:
Փաստաթղթերի համաձայն՝ ԱՄՆ առեւտրի նախարար Ուիլբուր Ռոսը կոմերցիոն շահեր ունի Մեծ Բրիտանիայում գործող Navigator Holdings-ի հետ: Այն իր հերթին համագործակցում է Ռուսաստանի նավթաքիմիական խոշորագույն հոլդինգ «Սիբուր»-ի հետ, որը պատկանում է Վլադիմիր Պուտինի մերձավոր շրջապատից անձանց: «Դրախտային թղթապանակ»-ում շրջանառվում են նաեւ Ռուսաստանի փոխվարչապետ Իգոր Շուվալովի կնոջ՝ Օլգայի, Ալիշեր Ուսմանովի, «Ռոսնեֆթ»-ի ղեկավարի նախկին կնոջ՝ Մարինա Սեչինայի, ռուսաստանցի ազդեցիկ փաստաբան եւ Վլադիմիր Պուտինի համակուրսեցի Նիկոլայ Եգորովի անունները:
«Դրախտային թղթապանակ»-ում շոշափվում է նաեւ Եղիսաբեթ 2-րդի անունը: Լանքասթերի դքսուհին, որը կառավարում է Մեծ Բրիտանիայի թագուհու անձնական եկամտի ակտիվները, 2004-2005 թվականներին շուրջ 10 մլն ֆունտի ներդրում է կատարել Կայմանյան կղզիներում գրանցված հիմնադրամում: Սպորտային հագուստ եւ կոշիկ արտադրող աշխարհահռչակ Nike-ը ֆինանսական այնպիսի սխեմա է կառուցել, որն օֆշորների օգնությամբ ընկերությանը թույլ է տվել ԱՄՆ սահմաններից դուրս խուսափել միլիարդավոր եվրոյի հարկեր վճարելուց: Հետաքննության համաձայն՝ ամերիկյան Apple-ը նույնպես գրանցված է եղել «հարկային դրախտի» երկրներից մեկում: Օֆշորային գործարքներում ներգրավված է նաեւ ԱՄՆ Դեմոկրատական կուսակցության խոշորագույն դոնորներից մեկը՝ Ջորջ Սորոսը:
Լրագրողական հետաքննությամբ զբաղվողներին հետաքրքրել են նաեւ Թուրքիայի վարչապետ Բինալի Յըլդըրըմի որդիները. պարզվում է՝ Բյուլենթ եւ Էրքան Յըլդըրըմները Մալթայի օֆշորային գոտում 4 ընկերություն ունեն: Հրապարակված փաստերը բացահայտումների փոքր մասն են միայն: Մյուսները կհրապարակվեն շաբաթվա ընթացքում:
Դոլարի վերելքը շարունակվում է, իսկ եվրոն եւ ռուբլին էժանացել են: Նոյեմբերի 6-ին դոլարի փոխարժեքը կազմել է 485 դրամ, եվրոյինը՝ 562, ռուբլունը՝ 8 դրամ 23 լումա, ֆունտինը՝ 635 դրամ:
Նոյեմբերի 7-ին հանրապետության շրջանների մեծ մասում սպասվում է անձրեւ: Օդի ջերմաստիճանը 2-3 աստիճանով կբարձրանա, հետո նույնքան կնվազի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +5+7, ցերեկը՝ +15+17 աստիճան տաքություն: