Մոլդովայի նախագահ Իգոր Դոդոնը Երեւան կատարած պաշտոնական այցի շրջանակներում նոյեմբերի 9-ին Երեւանի քաղաքապետ Տարոն Մարգարյանի ուղեկցությամբ այցելել է ցեղասպանության զոհերի հուշահամալիր։
Մոլդովայի նախագահը ծաղիկներ է դրել անմար կրակի մոտ, որից հետո մոլդովական պատվիրակության հետ այցելել է Եղեռնի զոհերի հուշարձանին: Նա նաեւ թանգարանի Պատվավոր հյուրերի գրքում գրառում է կատարել:
«Ինձ վրա մեծ զգացմունքային տպավորություն եւ անջնջելի հետք թողեցին պատմական փաստաթղթերը, լուսանկարները, հայ ժողովրդին ավելի քան հարյուրամյակ առաջ բաժին հասած ողբերգական դեպքերի ականատեսների՝ այստեղ թանգարանում եւ յուրաքանչյուր հայի սրտում պահպանվող վկայությունները», - գրել է Իգոր Դոդոնը:
Թանգարան այցից հետո Մոլդովայի նախագահը թանգարանի մոտ գտնվող պուրակում եղեւնի է տնկել: