Բրիտանիայի Օքսֆորդշիր կոմսությունում միջնակարգ դպրոցի մաթեմատիկայի ուսուցիչ 27-ամյա Ջոշուա Սաթքլիֆին աշխատանքից հեռացրել են, երբ նա պատահաբար տրանսգենդեր աշակերտին «աղջիկ» է անվանել: Այս մասին հայտնում է Daily Mail-ը:
Դասի ժամանակ ուսուցիչը մոտեցել է 2 աշակերտների նրանց աշխատանքը ստուգելու համար: Որոշելով նրանց գովաբանել՝ Սաթքլիֆը ասել է. «Լավ աշխատանք է, աղջիկներ»:
Դրանից հետո տրանսգենդեր աշակերտի ընկերուհին նշել է, որ իր ընկերն իրեն որպես «տղա» է նույնականացնում: Այդ ժամանակ ուսուցիչը սխալի համար ներողություն է խնդրել:
Կես տարի հետո նրան անսպասելիորեն աշխատանքից ազատել են: Պարզվել է, որ տրանսգենդեր երեխայի մայրը պաշտոնական բողոք է ներկայացրել: Նշվում է, որ ուսուցիչը երեխայի սեռի հարցում սխալվելով իբր խախտել է «հավասարության քաղաքականությունը»: Դրանից բացի, նրան մեղադրել են, որ նա դա մի քանի անգամ է արել, ինչպես նաեւ իր առարկայի դասավանդման ժամանակ կրոնի հարցեր է քննարկել:
Սաթքլիֆը խոստովանել է, որ նման շրջադարձից ցնցված է, եւ տեղի ունեցողը համեմատել է Ֆրանց Կաֆկայի ստեղծագործությունների հետ: