Մեծ Բրիտանիայի ԱԳ նախարար Բորիս Ջոնսոնը եւ շրջակա միջավայրի նախարար Մայքլ Գոուվը երկրի վարչապետ Թերեզա Մեյին խորհուրդ են տվել կառավարության անդամներին կարգապահության ընտելացնել եւ Բրյուսելին ԵՄ-ից դուրս գալու հարցում խիստ պահանջներ ներկայացնել, հայտնում է Mail on Sunday պարբերականը:
Խիստ ձեւակերպումներով հրահանգները շարադրված են նամակում՝ հասցեագրված անձամբ Մեյին, բայց նաեւ հայտնված պարբերականի տրամադրության տակ:
Նախարարները Բրիտանիայի վարչապետին կոչ են անում «ընդգծել իր վճռականությունը» Բրյուսելի հետ հարաբերությունները լիովին խզելու հարցում, մասնավորապես՝ հաստատել ԵՄ-ից դուրս գալուց հետո անցումային ժամանակահատվածի ավարտման վերանայման չենթակա վերջնական ժամկետ՝ 2021 թվականի հունիսի 30: Ջոնսոնը եւ Գոուվը պնդում են, որ կառավարության բոլոր անդամները Brexit-ի հարցում պետք է հետեւեն միանման խիստ ուղղությանը՝ «անկախ հանրաքվեի ժամանակ իրենց նախնական դիրքորոշումից», ըստ որում՝ խորհուրդ չի տրվում հանձնարարված ուղղությանը հակասող կարծիք արտահայտել ո՛չ պաշտոնական հայտարարություններում, ո՛չ մասնավոր զրույցներում: Նամակի հեղինակները նաեւ քննադատում են հարցին ֆինանսների նախարար Ֆիլիպ Համոնդի մոտեցումը, որը կարծում է, որ միությունից առանց նոր համաձայնագրի հասնելու դուրս գալը խափանում է ԵՄ-ի հետ «անկեղծ համագործակցության» սկզբունքները: Նախարարները Մեյին առաջարկել են իրեն հարմար ժամի հանդիպել եւ հարցը քննարկել:
