Կատալոնիայի անկախության հռչակման փորձերի շուրջ ստեղծված վիճակը հանգեցրել է տարածաշրջանի բնակիչների մոտ հոգեկան խանգարման, հայտնում է Diari de Tarragona–ն։
Կատալոնիայի՝ մեծությամբ երկրորդ քաղաքի՝ Տարագոնայի հոգեբանները հայտնել են, որ վերջին 2 ամսում իրենց սկսել են ավելի հաճախ դիմել հուզական խանգարումներից բողոքող մարդիկ։ Տարածաշրջանի բնակիչները նաեւ բողոքում են զայրույթի նոպաներից եւ վախի զգացողությունից։
Դեղատներում կտրուկ նվազել է պահպանակների վաճառքն ու աճել հանգստացնող դեղամիջոցների ու քնաբերի պահանջարկը։
Տարագոնայի հոգեբանների կոլեգիայի նախագահ Ժաումե Դեսկարեգան մեկնաբանել է իրավիճակը. «Երբ մենք կենտրոնանում ենք մեր կյանքի միայն մեկ ոլորտի վրա, մյուսները թերի են մնում։ Բարդ իրավիճակները կարող են ազդել լիբիդոյի վրա, դա կարող է վնասել այլ մարդկանց հետ մեր հարաբերություններին»,– ասել է նա։
«Միգուցե անկախության հռչակման շուրջ գործընթացները չեն հոգեբանին այցելելու հիմնական պատճառները, սակայն վերջին հաշվով այդ իրավիճակն իր մասին հիշեցնում է։ Այն մտահոգությունների առիթ է տալիս։ Մարդիկ մտածում են, որ այդ փոփոխությունները կանդրադառնան իրենց կյանքի վրա։ Մենք գիտենք, որ կատարվածը ընտանեկան, ընկերական եւ աշխատանքային հարաբերություններում խնդիրներ է ստեղծում»,– ասել է Դեսկարեգան։
Կատալոնիայի խորհրդարանը հոկտեմբերի 27-ին 70 կողմ, 10 դեմ եւ 2 ձեռնպահ ձայնով կողմ էր քվեարկել Իսպանիայից անկախանալուն։
Իսպանիայի Սենատն իր հերթին քվեարկել էր Սահմանադրության 155-րդ հոդվածը կիրառելու օգտին, որը կասեցնում է Կատալոնիայի ինքնիշխանությունը։ Նույն օրը Իսպանիայի վարչապետը ցրել էր Կատալոնիայի խորհրդարանը եւ նոր ընտրություններ նշանակել։
Իսպանիայի կառավարության պաշտոնական թերթում հաղորդումից հետո Կատալոնիայի կառավարումն անցել է Մադրիդին։