«Գենետիկորեն մոդիֆիկացված մթերքների կենսաբանական անվտանգության» մասին օրինագիծը չէր ընդունվել Հայաստանում «Մոնսանտո» ընկերության շահերի լոբբինգի պատճառով։ Նոյեմբերի 13-ին՝ լրագրողների հետ հանդիպման ժամանակ, այդպիսի կարծիք է հայտնել «Տապան» էկո-ակումբի ներկայացուցիչ Հրանտ Սարգսյանը։
Նրա խոսքով՝ «Գենետիկորեն մոդիֆիկացված մթերքների կենսաբանական անվտանգության» մասին օրինագիծը 4 տարի քննարկվել է հասարակական սեկտորում։ «Կան մարդիկ, որ Հայաստանում համագործակցել են «Մոնսանտո» ընկերության հետ եւ 11 տարի թույլ չեն տվել, որ այդ օրենքն ընդունվի»,- նշել է Սարգսյանը՝ հավելելով, որ «Մոնսանտոյի» հետ համագործակցող ընկերությունների թվում է նաեւ ինքը՝ Կառավարությունը։
Ընդ որում, փորձագետը նշել է, որ «Մոնսանտո» ընկերությունը, որն ամբողջ աշխարհում զբաղվում է գենետիկորեն փոփոխված մթերքների արտադրությամբ, Հայաստանում պաշտոնապես գործում է 2006-ից։ Նա նաեւ ընդգծել է, որ հենց հանրապետությունում շատ քիչ մարդ գիտեր այդ փաստի մասին։
Նշենք, որ ընկերությունը հիմնադրվել է ԱՄՆ-ում ավելի քան 100 տարի առաջ։ Այն գենետիկորեն փոփոխված մթերքների հակառակորդների մշտական քննադատության առարկան է։