ԱԻՆ-ն իր օգնությունն է առաջարկել Իրանին աղետի հետեւանքների վերացման գործում։ Այս մասին NEWS.am-ի հետ զրույցում հայտնեց Արտակարգ իրավիճակների նախարարության մամուլի խոսնակ Նանա Գնդոյանը
«Հայկական քաղաքային որոնողափրկարարական թիմը բերված է բարձր պատրաստականության: Այս թիմը ունի ՄԱԿ-ի հովանու ներքո տրամադրվող INSARAG միջազգային որոկավորում, որով, ի դեպ, տարածաշրջանում հայկական թիմը միակն է։ Թիմում ներառված են 47-50 հոգի։ Սպասում ենք իրանական կողմի պատասխանին։ Եթե նրանց կողմից պատասխան ստացվի, որ օգնություն պետք է, թիմը միանգամից կմեկնի Իրան՝ օգնություն տրամադրելու»,- նշեց նա։
Ավելի վաղ NEWS.am-ը հայտնել էր, որ նոյեմբերի 12-ին, տեղական ժամանակով ժամը 22:18-ին (Գրինվիչի ժամանակով` 18:18-ին) ՀՀ ԱԻՆ Սեյսմիկ պաշտպանության ծառայության սեյսմոլոգիական ցանցի կողմից գրանցվել է հյուսիսային լայնության 34.75 աստիճան եւ արեւելյան երկայնության 45.92 աստիճան աշխարհագրական կոորդինատներով (Իրան-Իրաք, Սարպոլ-է Զահաբ քաղաքից 33 կմ հյուսիս), օջախի 20 կմ խորությամբ, 7.2 մագնիտուդով երկրաշարժ: Ստորգետնյա ցնցման ուժգնությունն էպիկենտրոնում կազմել է 9-10 բալ: Երկրաշարժի հետեւանքով զոհերի թիվը անցել է 330-ից, տուժածների թիվը հասել է շուրջ 3950-ի: