Արեգակի վրայի բծերի թիվը սրընթաց նվազում է, պարզել են աստղագետները: Ներկայումս Երկրագնդին ուղղված Արեգակի կողմում ոչ մի բիծ չի նկատվում, ինչը վկայում է արեգակնային ակտիվության նվազման մասին: Այս մասին հայտնում են ՌԳԱ Ֆիզիկական ինստիտուտին առընթեր Արեգակի ռենտգենյան աստղագիտության լաբորատորիայի մասնագետները, փոխանցում է Gazeta-ն:
Արեգակի վրայի բծերը արեգակնային ակտիվության հիմնական բնութագրական նշանն են: Դրանց թիվն այն գլխավոր չափանիշն է, ըստ որի չափվում է 11-ամյա արեգակնային ցիկլը. 11 տարին մեկ բծերի թիվն առավելագույնի է հասնում, իսկ այս ժամանակաշրջանի միջակայքում աստիճանաբար նվազում է մինչեւ նվազագույն նիշ՝ արեգակնային նվազագույնի: Աստղագետների հաշվարկներով՝ դրան կհասնենք 2018 թվականի վերջին-2019 թվականի սկզբին: Այդ պահին Արեգակի մագնիսական էներգիան ամբողջությամբ կզորայանա, եւ աստղը կվերածվի գրեթե իդեալական համաչափ օբյեկտի՝ առանց որեւէ առանձնահատկության: Արեգակն այս վիճակում կմնա գրեթե մեկ տարի, որից հետո մագնիսական դաշտը դարձյալ կակտիվանա, եւ բծերը կհայտնվեն՝ վկայելով արեգակնային ակտիվության վերսկսման մասին:
Արեգակնային ակտիվության նվազումն առաջացնում է գիտնականների մեծ հետաքրքրությունը, քանի որ նախկինում հայտնաբերվել է կլիմայի փոփոխությունների հետ կապված այս ժամանակաշրջանների համահարաբերակցություն: Մասնավորապես՝ վերջին փոքր սառցե դարաշրջանը համընկել է Մաունդերի նվազագույնի հետ՝ 1645-1715 թվականներին տասնամյակներ տեւած արեգակնային ակտիվության նվազում: Ի դեպ, դրանից հետո ակտիվության փոփոխությունների մեջ խափանումներ չեն դիտվել: Հիմա փոփոխությունները տեղի են ունենում նախորդ 11-ամյա ցիկլերին դիտված փոփոխություններին համապատասխան: