Իրանի եւ Իրաքի սահմանին նոյեմբերի 12-ին 7.3 մագնիտուդով երկրաշարժ է տեղի ունեցել: Էպիկենտրոնը գտնվել է Իրաքի Հալաբջա քաղաքից 30 կմ հարավ-արեւմուտք: Էպիկենտրոնում երկրաշարժի ուժգնությունը կազմել է 9-10 բալ: Իրանում երկրաշարժի հետեւանքով 328 մարդ է զոհվել, եւս 6 զոհ կա Իրաքում: Ամենաշատ զոհերը գրանցվել են Իրանի Քերմանշահ նահանգում. այստեղ եռօրյա սուգ է հայտարարվել: Շուրջ 4000 մարդ տուժել է, 70 հազար իրանցի առանց տանիքի է մնացել: Տուժած շրջաններում վրանային ճամբարներ եւ դաշտային հոսպիտալներ են ստեղծվել: Հայաստանի ԱԳՆ-ի տվյալներով՝ երկրաշարժի հետեւանքով զոհերի եւ տուժածների թվում հայեր չկան: Հավելենք, որ ստորգետնյա ցնցումները 3 բալ ուժգնությամբ զգացվել են նաեւ Հայաստանում:

«Իգլա»-ի գործով մեղադրողը պահանջում է Սամվել Բաբայանին դատապարտել 7 տարվա ազատազրկման: Գործով այսօրվա նիստում Արամ Արամյանը հանդես է եկել մեղադրական ճառով՝ կարծիք հայտնելով, որ ամբաստանյալների մեղքն ապացուցված է: Երկարաշունչ ճառի ավարտին դատախազն ամբաստանյալներից Սանասար Գաբրիելյանի համար էլ 4 տարվա ազատազրկում է պահանջել: Մյուս հինգ ամբաստանյալներից երկուսի համար դատախազը պահանջել է 3-ական, երեքի համար՝ 2-ական տարվա ազատազրկում. նրանցից Անդրանիկ Քոչարյանի եւ Ժորա Զաքարյանի համար առաջարկել է ազատազրկումը կիրառել պայմանականորեն՝ 3 տարի փորձաշրջանով: Հաջորդ՝ նոյեմբերի 20-ի դատական նիստում ճառով հանդես կգա պաշտպանական կողմը: Հիշեցնենք, որ մեղադրական եզրակացության համաձայն՝ Սամվել Բաբայանը մի խումբ անձանց դրդել է նախնական համաձայնությամբ ապօրինի կերպով «Իգլա» տեսակի դյուրակիր զենիթահրթիռային համալիր ձեռք բերել, փոխադրել եւ պահել:

«Տաշիր» ընկերությունների խումբը Հայաստանի ներդրողների ակումբի եւ միջազգային ֆինանսական ինստիտուտների հետ առաջիկա տարիներին շուրջ մեկ մլրդ դոլարի ներդրում կկատարի Հայաստանի էներգետիկայի ոլորտում։ ՀԷՑ-ի տնօրենների խորհրդի նախագահն այսօր հայտարարել է, որ Լոռիում «Շնող» ՀԷԿ-ն է կառուցվելու. նախապատրաստական աշխատանքները կավարտվեն 4 տարվա ընթացքում, ծրագիրը 150-190 մլն դոլար կարժենա: Ներդրումներ են արվելու բաշխիչ ցանցերում եւ հիդրոէներգետիկայի բնագավառներում: Այսօր պայմանագրեր են ստորագրվել Ասիական Զարգացման Բանկի ու Վերակառուցման եւ Զարգացման Եվրոպական Բանկի հետ՝ 160 մլն դոլարի ներգրավման նպատակով: Եվրասիական Զարգացման Բանկի հետ էլ 100 մլն դոլարի ներգրավման նպատակով փոխգործակցության հուշագիր է ստորագրվել:

Վիգեն Սարգսյանի՝ զինվորական ծառայությունից տարկետում ստանալու հիմնավորվածության շուրջ ծավալված աղմուկը նոր ընթացք է ստանում: Նիկոլ Փաշինյանն այսօր Facebook-ում գրել է, որ պաշտպանության նախարարի տարկետման հիմքերն իրեն չեն տրամադրվել: Պատգամավորը զինվորական կոմիսարին գրություն էր ուղարկել՝ պահանջելով իրեն տրամադրել այն փաստաթղթերը, որոնց հիման վրա 1993 թվականին զորակոչիկ Վիգեն Սարգսյանը ժամկետային զինվորական ծառայությունից տարկետում է ստացել: Զինկոմի պատասխանին, Փաշինյանի հավաստմամբ, փաստաթղթեր կցված չեն եղել. զինկոմը տեղեկացրել է, որ դրանք ոչնչացվել են:

Պաշտպանության նախարարության խոսնակն արագորեն արձագանքել է Փաշինյանի գրառմանը: Արծրուն Հովհաննիսյանը պարզաբանել է, որ պահեստազորի որեւէ շարքայինի գործ նրա՝ սպա դառնալուց հետո չի պահպանվում: Ավելին, Հովհանիսյանի հավաստմամբ, սահմանված ժամկետը լրանալուց հետո վերացվում են անգամ պահեստազորային շարքայինների գործերը:

Հանգստյան օրերի դադարից հետո տարկետման վերացման դեմ բողոքող ուսանողներն այսօր նորից հավաքվել են Երեւանի պետհամալսարանի մոտ: Նրանք շարունակել են դասադուլը, նաեւ նորից շրջել բուհերով եւ ուսանողներին կոչ արել միանալ իրենց: Կողմերի դիրքորոշումը, փաստորեն, չի փոխվել. ուսանողները պահանջում են տարկետման իրավունքի վերացումը չներառել զինծառայության մասին օրենքի նախագծում, իսկ կառավարությունը չի պատրաստվում զիջել: Նշենք, որ նոյեմբերի 10-ի երեկոյան ուսանողները հավաքվել էին Ազգային ժողովի շենքի մոտ եւ պահանջում էին իրենց ներկայացուցիչներին թույլ տալ մասնակցել պաշտպանության հարցերի խորհրդարանական հանձնաժողովի նիստին: Նրանց չէին արձագանքել, իսկ քվորումի բացակայության պատճառով հետաձգված հանձնաժողովի նիստը ժամեր անց, այնուամենայնիվ, կայացել է: Օրենքի նախագիծը նիստում քննարկվել է եւ դրական եզրակացությամբ ուղարկվել Ազգային ժողովի՝ նոյեմբերի 14-ին մեկնարկելիք քառօրյայի օրակարգ:

Երեւանի Ջոն Կիրակոսյանի անվան դպրոցում սովորող առաջին դասարանցի երեխայի ծնողները պնդում են, որ դասընկերներն իրենց 7-ամյա երեխայի նկատմամբ բռնություն են գործադրել: 47-ամյա Մարինե Սարգսյանն ահազանգել է, որ դասընկերները որդու ձեռքերը սկոտչով կապել են, զուգարանում ծեծել, հետո կտրել թարթիչները: Դպրոցի տնօրենն ու երեխայի դասղեկը, սակայն, այլ բան են պնդում. երեխան ինքն է կտրել թարթիչները, իսկ ծեծի մասին պնդումները տղայի երեւակայության արդյունքն են: 7-ամյա Արտյոմը թարթիչները կտրելու մասին ուսուցչուհուն պատմել է, երբ վերջինը նկատել է դա ու ահազանգել ծնողներին: Տղայի մայրը դեպքից միայն 4 օր անց է ահազանգել որդուն ծեծի ենթարկելու մասին եւ դիմել ոստիկանություն: Հետաքննություն է սկսվել: 

Տավուշի մարզում արտակարգ դեպք է տեղի ունեցել: Նոյեմբերի 11-ին Հովք գյուղի վարչական շրջանում մարդիկ թափառող շան երախում մարդու մարմնի մաս են նկատել: Ահազանգի հետքերով դեպքի վայր ժամանած իրավապահները գետի ափին բերանքսիվայր ընկած, ինքնությունը չպարզված կնոջ հոշոտված դի են հայտնաբերել:

Այսօր արդեն դեպքի նոր մանրամասներ են հայտնի դարձել: Քննչական կոմիտեի տեղեկացմամբ՝ կատարվածը, ենթադրաբար, սպանություն է. կնոջ մարմնի վրա բռնության հետքեր կան, այդ թվում՝ գլխի հատվածում: Կնոջ ինքնությունը, սակայն, դեռեւս պարզ չէ: Ոստիկանությունը կնոջ հագուստի լուսանկարներն է հրապարակել եւ ճանաչողներին խնդրել արձագանքել: Դիակի արտաքին զննության արդյունքներով՝ կինը շուրջ 35 տարեկան է եղել:

Դոլարի վերելքը վերսկսվել է, եվրոն էժանանում է: Նոյեմբերի 13-ին դոլարի փոխարժեքը կազմել է 487 դրամ, եվրոյինը՝ 567, ռուբլունը՝ 8 դրամ 20 լումա, ֆունտինը՝ 637 դրամ:

Նոյեմբերի 14-ին հանրապետությունում սպասվում է առանց տեղումների եղանակ: Օդի ջերմաստիճանը 15-ի ցերեկը 2-3 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +3+5, ցերեկը՝ +12+14 աստիճան տաքություն: