ՀՀ Տնտեսական մրցակցության պաշտպանության պետական հանձնաժողովի որոշմամբ, այսօր՝ նոյեմբերի 14-ին, հարուցվել է վարչական վարույթ՝ «Էմ Այ Բի Քոնսալթինգ» («Դիլիջան ֆրոլովա» ապրանքանիշ ) ընկերության հանդեպ: Վարչական վարույթը հարուցվել է մրցակից ընկերության՝ «Դիլիջան» հանքային ջրի գործարանի դիմում-բողոքի հիման վրա: Այս մասին NEWS.am-ը տեղեկանում է ՏՄՊՊՀ-ից:
Ըստ բողոքի բովանդակության, «Դիլիջան ֆրոլովան» նմանակում է «Դիլիջան» հանքային ջրի արտադրանքը, ինչը սպառողների շրջանում առաջացնում է մոլորություն եւ շփոթություն:
Ըստ բողոքող կողմի, խանութներում վաճառվում է ապակյա նույն տարաներով, նույն գունային համադրությունն ունեցող պիտակներով հանքային ջուր այն դեպքում, երբ իրենք դեռեւս 2009 թվականին Մտավոր սեփականության գործակալությունում գրանցել են «Դիլիջան» ապրանքային նշանը:
Ըստ բողոքի, մրցակից ընկերության նման վարքագիծը անբարեխիղճ մրցակցության դրսեւորում է: «Դիլիջան» հանքային ջրի գործարանը ՀՀ Մրցակցային մարմնից խնդրում է վարչական վարույթի շրջանակներում լուծում տալ խնդրին եւ արգելել իրենց պատկանող ապրանքային նշանի օգտագործումն ու իրենց արտադրանքի նմանակումը:
Նշենք նաեւ, որ խնդրի մասին դիմող տնտեսվարողը բարձրաձայնել էր ՀՀ Տնտեսական մրցակցության պաշտպանության պետական հանձնաժողովի՝ օրերս Տավուշի մարզ կատարած այցի ժամանակ: Մարզի մի շարք գործարարներ Ա. Շաբոյանի հետ հանդիպման ընթացքում բարձրացրեցին իրենց հուզող խնդիրները, իսկ ՏՄՊՊՀ նախագահը խոստացավ լինել հետեւողական եւ Մրցակցային մարմնի տիրույթում գտնվող բոլոր հարցերին սեղմ ժամկետներում լուծում տալ: