Երեւանի պետական համալսարանի շենքի դիմաց այս պահին հավաքվել են մեծ թվով ուսանողներ եւ սատարում են տարկետման իրավունքի սահմանափակման դեմ բողոքող եւ այսօր հացադուլ հայտարարած 5 ուսանողներին: Նրանք հայտարարեցին, որ իրենք այստեղ կմնան այնքան ժամանակ, մինչեւ իրենց պահանջը կատարվի եւ իրենց 5 ընկերները դադարեցնեն հացադուլը:
NEWS.am-ի թղթակիցը հաղորդում է, որ այսօր 5 ուսանողներ հացադուլ են հայտարարել ԵՊՀ ինֆորմատիկայի եւ կիրառական մաթեմատիկայի ֆակուլտետի լսարաններից մեկում: Նրանք փակել են դուռը եւ թույլ չեն տալիս, որ ինչ-որ մեկը մտնի ներս:
Ֆակուլտետի անվտանգության աշխատակիցները արգելու են լրագրողների մուտքը շենք՝ նշելով, որ այսպիսով խաթարվում է դասապրոցեսը:
Հացադուլ հայտարարած 5 ուսանողները «Հանուն գիտության զարգացման» նախաձեռնության անդամներ են՝ Դավիթ Պետրոսյանը, Յուրի Մովսիսյանը, Լեւոն Չուքակալյանը, Գեղամ Ասատրյանը եւ Հարությունը (նա չցանկացավ, որ իր անունը հրապարակվի):
Նշենք, որ հացադուլավորներից Դավիթ Պետրոսյանը հայտարարել է, որ հացադուլ հայտարարածներից 4-ը ծառայել են բանակում. «Հացադուլի նպատակն է հասարակական անտարբերության, ինչպես նաեւ տարկետման իրավունքը սահմանափակող օրինագծի դեմ պայքարը»,-նշել է նա:
Հիշեցնենք, որ նոյեմբերի 9-ին դասադուլավոր ուսանողները հանդիպել են վարչապետ Կարեն Կարապետյանի, ՊՆախարար Վիգեն Սարգսյանի եւ ԿԳ նախարար Լեւոն Մկրտչյանի հետ: Կառավարությունում երկու ժամ տեւած հանդիպման ընթացքում կողմերն այդպես էլ համաձայնության չէին եկել:
Նոյեմբերի 10-ի ուշ երեկոյան հրավիրվել էր ՀՀ Ազգային անվտանգության, պաշտպանության և ներքին հարցերի հանձնաժողովի արտահերթ նիստ եւ նախագիծը, դրական եզրակացությամբ, ուղարկվել ԱԺ առաջիկա քառօրյայի օրակարգ: ՊՆ փոխնախարար Արտակ Զաքարյանը հայտարարեց, որ օրենքի նախագծում արվել են որոշակի զիջումներ, մասնավորապես բացառիկ տաղանդավոր ուսանողները կազատվեն զինծառայությունից: ԱԺ քառօրյան մեկնարկում է նոյեմբերի 14-ին:
Ավելի վաղ NEWS.am-ը հայտնել էր, որ «Հանուն գիտության զարգացման» նախաձեռնության անդամները դասադուլով պահանջում են պահպանել ներկայում գործող ակադեմիական տարկետման իրավունքի սկզբունքները: Պաշտպանության նախարարության առաջարկած «Զինվորական ծառայության եւ զինծառայողի կարգավիճակի մասին» օրենքի նախագծով առաջարկվում է խիստ սահմանափակել այդ իրավունքը:
Մասնավորապես, տարկետման իրավունք կստանան միայն այն ուսանողները, որոնք պայմանագիր կկնքեն ՊՆ-ի հետ, որով կպարտավորվեն, որ ուսումն ավարտելուց հետո կծառայեն արդեն ոչ թե 2, այլ երեք տարի, բայց որպես սպա:
