Բյուրեղավանի գիշերօթիկ դպրոցից խոշոր չափի յուրացում կատարելու գործով համապատասխանաբար 6,5 տարվա եւ 5,5 տարվա ազատազրկման դատապարտված Գայանե Մարգարյանն ու Փառանձեմ Մարտիրոսյանը վերաքննիչ բողոք են ներկայացրել:
Դպրոցի նախկին տնօրեն Գայանե Մարգարյանը, որն ավելի քան 3 տարի է՝ կալանքի տակ է, պահանջում է առաջադրված մեղադրանքների ծավալից հանել հափշտակության մասով նշված 17 մլն 183 հազար դրամն ու մնացած 4,5 մլն դրամի վնասի վերականգնման համար սահմանել համամասնական կարգ: Նա պահանջում է նաեւ նշանակվելիք պատիժը պայմանականորեն չկիրառել: Դպրոցի նախկին աշխատակից Փառանձեմ Մարտիրոսյանն էլ պահանջում է վերաորակել մեղադրանքն ու պատիժ սահմանել տուգանքի ձևով, հակառակ դեպքում, նշանակվելիք պատիժը պայմանականորեն չկիրառել:
Նշենք, որ գործով 3 տարվա պայմանական ազատազրկման դատապարտված Արաքս Հովսեփյանը Վերաքննիչ չի դիմել:
Հիշեցնենք, որ ըստ մեղադրական եզրակացության՝ դպրոցի արդեն նախկին տնօրեն Գայանե Մարգարյանը ուղիղ 10 տարի պարբերաբար, առանց աշխատանքի ընդունելու մտադրության` շահադիտական նպատակով, կազմել է հաստատությունում փաստացի աշխատանքի չհաճախող, իսկ 2007 թվականի սեպտեմբերից կազմակերպության կադրերի գծով տեսուչ Արաքս Հովսեփյանին է հանձնարարել կազմել հաստատությունում փաստացի աշխատանքի չհաճախող ընդհանուր 16 անձի հետ աշխատանքային կեղծ պայմանագրեր: Այնուհետեւ նա անձամբ հաստատել է կեղծ պայմանագրերը, հրամանագրել է հաստատությունում փաստացի աշխատանքի չհաճախող 16 անձ, որից հետո Արաքս Հովսեփյանի եւ Փառանձեմ Մարտիրոսյանի հետ աշխատավարձի հաշվարկի պաշտոնեական կեղծ փաստաթղթեր: Դպրոցի այս երեք աշխատակիցները ելքագրել են 36 մլն 370 հազար ՀՀ դրամ: