Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանում նոյեմբերի 13-ին, ժամկետային զինծառայողին ծառայությունից ազատելու համար կաշառք պահանջելու եւ ստանալու https://news.am/arm/news/416092.html գործով դատավճիռ է կայացվել:
Ըստ մեղադրանքի, ժամկետային զինծառայող Խաչիկ Խաչատրյանին ծառայությունից ազատելու համար նրա ծնողները 1100 ԱՄՆ դոլար են տվել Երեւանի քաղաքացի Սաթենիկ Սարգսյանին, որն էլ այն Երվանդ Կարապետյանի միջոցով փոխանցել է հոսպիտալի բժիշկ Աշոտ Սիմոնյանին:
Դատարանը վճռել է Երվանդ Կարապետյանին դատապարտել 1 տարվա ազատազրկման՝ պատիժը պայմանականորեն չկիրառելով եւ նշանակելով փորձաշրջան 1 տարի ժամկետով, հոսպիտալի բժիշկ Աշոտ Սիմոնյանին՝ տուգանել 1 մլն դրամով, ժամկետային զինծառայող Խաչիկ Խաչատրյանի ծնողներին՝ Կարինե Խաչատրյանին եւ Արգամ Սիմոնյանին, 2 տարվա պայմանական ազատազրկման: Սաթիկ Սարգսյանին դատարանը վճռել է տուգանել 200 հազար դրամով: Նշենք, որ Սաթիկ Սարգսյանի համար մեղադրող Լեւոն Պետրոսյանը պահանջել էր 1 տարվա ազատազրկում: Ի դեպ, Սաթիկ Սարգսյանը մեկ այլ գործով երկու ամիս առաջ 5 տարվա ազատազրկման է դատապարտվել եւ այժմ նա կալանքի տակ է գտնվում:
Հիշեցնենք, որ այս գործով բոլոր ամբաստանյալները, բացի Աշոտ Սիմոնյանից, ընդունել էին իրենց առաջադրված մեղադրանքները:
NEWS.am-ի հետ զրույցում Երվանդ Կարապետյանի պաշտպան Գիվի Հովհաննիսյանը հայտնեց, որ ամենայն հավանականությամբ, դատավճիռը չեն բողոքարկի: Չի բացառվում, որ մեղադրողը Վերաքննիչ կդիմի, քանի որ առնվազն Սաթիկ Սարգսյանի համար նա ազատազրկում էր պահանջել:
