Գալիս են տոնավաճառ, փակում են շուկաների մուտքերը, հաճախորդներին են վախեցնում, չենք կարողանում դիմանալ ՊԵԿ-ի այդ ահաբեկչումներին: Այս մասին, այսօր՝ նոյեմբերի 14-ին, ԱԺ-ի մոտ տոնավաճառների աշխատակիցների բողոքի ակցիայի ժամանակ լրագրողների հետ զրույցում նշեց «Համերաշխություն» ՀԿ-ի նախագահ Արմեն Ներսիսյանը:
«Եթե նպատակ ունեն ՀԴՄ չխփելու համար 175 հազար տուգանեն, դա ուրիշ խնդիր է: Մենք գիտենք, թե իրականում որն է նրանց նպատակը: Թող էնքան շնորհք ունենան ու մարդկային լեզվով խոսեն, թե չէ՝ մարդիկ մտնում են հարկային, վախից աշնան տերեւի նման դողում են: Մենք չենք կարողանում դիմակայել, մեզ հետ կոպիտ են խոսում, ու մենք չենք կարող այլևս մարսել այդ խոսելաոճը»,-ասաց նա:
Բողոքի ակցիայի մասնակիցներից Սուսաննա Ալեքսանյանն էլ նշեց. «Օրենքն ընդունված է, որ 2017-2018 թվականներին ամեն մի գործ անող իրավունք ունի կամ 1,5 տոկոս շահութահարկ վճարի կամ 5 տոկոս: Եթե 1,5 տոկոս է վճարում, պետք է բոլոր փաստաթղթերը ներկայացնի, բայց դա շատ դժվար է եւ քաշքշուկների առիթ է տալիս, կաշառակերության դուռ է բացում: Դրա համար շատերը նախընտրեցին աշխատել 5 տոկոսով: Իսկ այսօր պարտադրում են, ապրանքը մարդկանց չեն տալիս, մինչեւ «Նորֆոլկ» ընկերության հետ պայմանագիր չունենան: Այսինքն մեզ բռնի կերպով պարտադրում են, որ 1,5 տոկոսով աշխատենք: Մենք պատրաստ ենք բոլոր հարկերը մուծել, մենք հանցագործներ չենք: Մենք պատրաստ ենք վճարել, միայն ուզում ենք թղթաշրջանառությունը պակասեցնեն»:
Հիշեցնենք, որ տոնավաճառների, մասնավորապես «Առինջ մոլ»-ի առեւտրականները պահանջում են ազատել իրենց լրացուցիչ փաստաթղթեր ներկայացնելուց, քանի որ դա լրացուցիչ ծախսեր է պահանջում իրենցից: Նրանք հայտարարել են, որ պատրաստ են վճարել հարկերը: ՊԵԿ նախագահ Վարդան Հարությունյանն էլ հայտարարել էր, որ չի կարելի խրախուսել մարդկանց, որոնք չեն ուզում հարկեր վճարել: Նշենք, որ «Առինջ մոլը» պատկանում է «Ծառուկյան» դաշինքի առաջնորդ Գագիկ Ծառուկյանին:
Օրեր առաջ բախում էր տեղի ունեցել «Առինջ մոլում» առեւտրականների եւ ՊԵԿ աշխատակիցների միջեւ: Ըստ առեւտրականների, հարկայինի աշխատակիցներից մեկը վրաերթի էր ենթարկել առեւտրականներից մեկին ու դիմել փախուստի: