Սույն թվականի հոկտեմբեր եւ նոյեմբեր ամիսների ընթացքում Ինեկոբանկը միկրոֆինանսավորման նպատակով վարկային միջոցներ է ստացել Symbiotics կազմակերպությունից ընդհանուր առմամբ 9 մլն ԱՄՆ դոլարին համարժեք դրամի չափով:
Այսպիսով, Ինեկոբանկի եւ Symbiotics-ի միջեւ կնքված պայմանագրերի ընդհանուր գումարը կազմեց շուրջ 14մլն. ԱՄՆ դոլար, ինչը վկայում է կազմակերպությունների միջեւ արդյունավետ եւ երկարաժամկետ համագործակցության մասին: Ներգրավված ֆոնդերը Ինեկոբանկի կողմից կուղղվեն միկրովարկավորման ոլորտ` նպաստելով տնտեսական զարգացմանն ու նոր աշխատատեղերի ստեղծմանը:
«Ինեկոբանկը 2010թ.-ից համագործակցում է Symbiotics հիմնադրամի հետ: Այս տարիների ընթացքում մենք միասին իրականացրել ենք մի շարք արդյունավետ ծրագրեր եւ ուրախ ենք եւս մեկ անգամ ամրապնդել հարաբերությունները մեր կառույցների միջեւ, որոնք ուղղված են մեր հաճախորդների համար էլ ավելի գրավիչ առաջարկների ստեղծմանը: Այս վարկի ներգրավումը հատկանշական է նրանով, որ բանկին վարկային միջոցները տրամադրվել են ՀՀ դրամով, ինչը թույլ է տալիս մեր հաճախորդներին առաջարկել էլ ավելի գրավիչ պայմաններով վարկային միջոցներ» - նշեց Ինեկոբանկի գործադիր տնօրենի ժամանակավոր պաշտոնակատար Գառնիկ Թադեւոսյանը:
Ինեկոբանկը, շարունակում է ընդլայնել արդյունավետ համագործակցությունը միջազգային հեղինակավոր կառույցների հետ, ինչի արդյունքում միայն այս տարվա վերջին միջազգային գործընկերներից ներգրաված գումարը կկազմի 54 մլն. ԱՄՆ դոլար: