Հարավարեւելյան Ասիայի պետությունների ասոցիացիայի երկրների առաջնորդները երեքշաբթի համաձայնագիր են ստորագրել աշխատանքային միգրանտների պաշտպանության եւ իրավունքների մասին, որը Մանիլայում «ասիական տասնյակի» գագաթնաժողովի գլխավոր արդյունքներից էր, փոխանցում է ՏԱՍՍ–ը։

Փաստաթուղթն ուղղված է միգրանտների համար սոցիալական պաշտպանության, արդարադատության եւ առողջապահության հասանելիություն ապահովմանը։ «Համաձայնագիրը միգրանտներին ընտանիքի անդամների այցելության իրավունք է ապահովում, արգելում այդ անդամների անձնագրերի բռնագրավումը, պաշտպանում աշխատավայրում սեռական ոտնձգություններից, կոչ անում հարգել արդարացի պարգեւատրման  եւ արհմիությունների ու ասոցիացիաների անդամակցելու նրանց իրավունքը»,– ասված է փաստաթղթի մեկնաբանության մեջ։

Ֆիլիպինների նախագահ Ռոդրիգո Դուտերտեն, որի երկիրն այս տարի նախագահում է Հարավարեւելյան Ասիայի պետությունների միությունում, բազմիցս այդ համաձայնագիրն անվանել էր նշանակալի, քանի որ դրա մշակման համար մոտ 10 տարի է անհրաժեշտ եղել։