Մոսկվայի շրջանում ԱԴԾ-ն ձերբակալել է «Թաբլիղի Ջամաաթ» ծայրահեղական կազմակերպության մոտ 70 ղեկավարների եւ անդամների, հայտնում է «ՌԻԱ Նովոստի»-ն՝ վկայակոչելով ՌԴ ԱԴԾ Հասարակական կապերի կենտրոնին:
«Ձեռնարկված միջոցառումների ընթացքում ձերբակալվել են ծայրահեղական միավորման 69 անդամներ, այդ թվում նրա ղեկավարները: Խուզարկությունների ընթացքում առգարվվել են ծայրահեղական գրականություն, կապի միջոցներ, ինչպես նաեւ տեղեկությունների էլեկտրոնային կրիչներ՝ հակաօրինական գործունեության հաշվետվությամբ: ՌԴ Քննչական կոմիտեի Մոսկվայի Կունցեւոյի քննչական բաժնում քրեական գործ է հարուցվել»,- նշված է հաղորդագրության մեջ:
«Թաբլիղի Ջամաաթը» 1926 թվականին Հնդկաստանում հիմնադրել է Մաուլան Մուհամմադ Իլյասը: 2009 թվականին ՌԴ Գերագույն դատարանն այն ծայրահեղական է ճանաչել, որը «սպառնում է Ռուսաստանի հանրության կայունությանը եւ երկրի տարածքային ամբողջականությանը»:
Արմատական կազմակերպությունը քարոզում է նախկինում իսլամում ընդունված վարքի մոդելին վերադարձ, եւ բազմիցս մեղադրվել է ահաբեկչական խմբավորումների հետ կապերի մեջ: Հրապարակային աղբյուրների տեղեկություններով՝ «Թաբլիղի Ջամաաթի» կողմնակիցների մեծ մասն ապրում է Հարավային Ասիայում:
