Կառավարությունը մեծ սխալ է թույլ տվել, որովհետեւ քաղաքական քթածակ չի կարողացել ցուցաբերել: Այս մասին այսօր՝ նոյեմբերի 14-ին, խորհրդարանում հայտարարությունների ժամի ընթացքում ասաց «Ծառուկյան» դաշինքի պատգամավոր, ԱԺ փոխնախագահ Միքայել Մելքումյանը՝ անդրադառնալով տոնավաճառների առեւտրականների բողոքին:
«Տոնավաճառների մեր հայրենակիցների գործունեության վարչարարության հետ կապված Կառավարությունը մեծ սխալ է թույլ տվել, որովհետեւ քաղաքական քթի ծակ չի կարողացել ցուցաբերել: Մենք հետամուտ ենք լինելու մինչեւ վերջ եւ ցույց ենք տալու, որ իրենց տնտեսագիտական հաշվարկները սխալ են»,- ասաց Միքայել Մելքումյանը:
ԱԺ փոխնախագահը հորդորեց նախ եւ առաջ ուսումնասիրել գազի ոլորտը: Նա հիշեցրեց, որ 3,5 տարի առաջ գազամատակարարման համակարգի մասին որոշում է ընդունվել խորհրդարանում եւ անհրաժեշտ է հետամուտ լինել պարզելու, թե որտեղից 7,5-8 տոկոս կորուստները:
«Այսինքն 50-55 մլն դոլարի կորուստ ենք ունենում, ի՞նչ է դա նշանակում, ո՞նց է ստացվում, որ այդքան կորուստ է լինում»,- ասաց Միքայել Մելքումյանը:
Հիշեցնենք, որ տոնավաճառների, մասնավորապես «Առինջ մոլ»-ի առեւտրականները պահանջում են ազատել իրենց լրացուցիչ փաստաթղթեր ներկայացնելուց, քանի որ դա լրացուցիչ ծախսեր է պահանջում իրենցից: Նրանք հայտարարել են, որ պատրաստ են վճարել հարկերը: ՊԵԿ նախագահ Վարդան Հարությունյանն էլ հայտարարել էր, որ չի կարելի խրախուսել մարդկանց, որոնք չեն ուզում հարկեր վճարել: Նշենք, որ «Առինջ մոլը» պատկանում է «Ծառուկյան» դաշինքի առաջնորդ Գագիկ Ծառուկյանին: