Ղրղզստանը Ղազախստանի գործողությունների պատճառով Եվրասիական տնտեսական միությունից դուրս չի գա: Այս մասին հայտարարել է Ղրղզստանի նախագահ Ալմազբեկ Աթամբաեւը, հայտնում է «ՌԻԱ Նովոստի»-ն:
«Մենք երբեք չենք պատրաստվել ու չենք պատրաստվում դուրս գալ: ԵՏՄ-ին անդամակցելը ճիշտ որոշում է, եւ մենք պետք է Միությունում մնանք: Սակայն իրականությունն այնպիսին է, որ արդեն մեկ ամիս է՝ Ղազախստանի պատճառով Ղրղզստանն իրականում կտրված է ԵՏՄ-ից»,- ասել է Աթամբաեւը:
Հստակեցվում է, որ Ղազախստանը սահմանափակումներ է մտցրել սահմանով ղրղզական ապրանքների տեղափոխման համար:
Աթամբաեւի խոսքով՝ Ղազախստանի գործողությունների պատճառը հարեւան երկրի իշխանությունների վերաբերյալ իր քննադատական հայտարարություններն են:
Ավելի վաղ հաղորդվել էր, որ ՌԴ վարչապետ Դմիտրի Մեդվեդեւը հույս է հայտնել, որ Ղրղզստանի եւ Ղազախստանի միջեւ տնտեսական հարցի լուծման հնարավորությունը կգտնվի:
Հոկտեմբերի սկզբին Աթամբաեւն ասել էր, որ Ղազախստանի իշխանությունները Ղրղզստանին են պարտադրում իրենց թեկնածուին:
Հետագայում Ղրղզստանի նախագահը ընդունել էր, որ Ղազախստանի նախագահին ուղղված ավելորդ զգացմունքայնություն է թույլ տվել:
