Վերջին 15 տարիներին մենք կորցրել ենք հայկական ավիացիան: Այս մասին այսօր՝ նոյեմբերի 15-ին, խորհրդարանում ««Ելք» խմբակցության հարցապնդումը քաղավիացիայի» մասին հարցի քննարկման ժամանակ ասաց խմբակցության ղեկավար Նիկոլ Փաշինյանը:
««Զվարթնոց» օդանավակայանից շաբաթական 206 չվերթ է իրականացվում, որի 53 տոկոսն իրականացնում են ռուսական ընկերությունները դեպի Ռուսաստանի տարբեր քաղաքներ: Գյումրիից բացառապես միայն Ռուսաստան են մեկնում, հիմա Հայաստանում կա՞ հայկական ավիաընկերություն: Այո, կա, բայց դեպի Մոսկվա չվերթ չունի, այսինքն տրանզիտ չունի, թռնում է միայն փակուղային տեղեր: Ռուսական ընկերությունները մոնոպոլիզացրել են մեր շուկան, դարձել ազգային փոխադրող: Ռուսական ավիաընկերությունները Հայաստանում կազմում են ընդհանուրի 25 տոկոսը՝ տիրապետելով 53 տոկոսին»,- ասաց Փաշինյանը:
Սրան հակառակ, ըստ «Ելք» խմբակցության ղեկավարի, Վրաստանից թռիչքները դեպի Մոսկվա կիսվել են վրացական եւ ռուսական ընկերությունների միջեւ: Ինչ վերաբերում է խորհրդարանում հնչած կարծիքներին, թե Վրաստանում էլ թուրքական ազդեցությունն է մեծ, Փաշինյանն ընդգծեց՝ թուրքական ավիաընկերությունները Վրաստանում կազմում են ընդհանուրի ընդամենը 20 տոկոսը:
«Մենք կորցրել ենք հայկական ավիացիան, որովհետեւ հայկական ավիաընկերությունների համար շուկան փակ է: Մենք կորցրել ենք մեր ազգային ավիացիան: Սերժ Սարգսյանը 2011թ.-ին հայտարարեց, որ դառնալու է Երեւան-Ստեփանակերտ չվերթի առաջին ուղեւորը, բայց փաստացի դարձել է հայկական ավիացիայի վերջին ուղեւորը, որովհետեւ միայն նրա ինքնաթիռն է, որ կրում է հայկական ավիացիայի ատրիբուտներ»,- ասաց Փաշինյանը: