Անհրաժեշտ է շինարարության թույլտվության տրամադրման գործընթացը դյուրացնել: Նոյեմբերի 16-ին կառավարության նիստում այս մասին հայտարարեց վարչապետ Կարեն Կարապետյանը: Նա նշեց, որ այս ոլորտում վարչարարությունը եւ ծառայություններ ստանալու հասանելության մեծացումը պետք է ուշադրության կենտրոնում լինեն, քանի որ եղած խնդիրները բացասաբար են ազդում ընդհանրապես շինարարության հայրենական ոլորտի զարգացման վրա:
«Գործող օրենսդրության համաձայն՝ այդ թույլտվությունները տրամադրում են իշխանության տեղական մարմինները: Սակայն դրանց տրամադրման նորմատիվ մեխանիզմները պետք է ավելի հստակ ու թափանցիկ դարձնել, իսկ ընդունված որոշումները չափազանց հիմնավորված»,- պարզաբանեց վարչապետը: Նա նաեւ հավելեց, որ Համաշխարհային բանկի Doing business վերջին զեկույցում Հայաստանում շինարարության թույլտվության տրամադրման գործընթացը կարգավորման տեսակետից գնահատվել է որպես խնդրահարույցներից մեկը:
Դրանից ելնելով՝ կառավարության ղեկավարը տարածքային կառավարման եւ զարգացման նախարարին եւ Քաղաքաշինության պետական կոմիտեի նախագահին հանձնարարել է երկու ամսվա ընթացքում շինարարության թույտվություն տալու գործընթացի դյուրացման եւ կոնկրետացման մեխանիզմներ մշակել եւ ներկայացնել: Նաեւ դիտարկել թվային գործիքների ներդրման հնարավորությունները եւ որոշել գործընթացի վերահսկման մեխանիզմները:
Հիշեցնենք, որ Doing business-ի հետազոտության մեջ հաշվի են առնվում բոլոր գործընթացները, որը պետք է անցնի շինարարական ընկերությունը, այդ թվում՝ գործընթացն անցնելու ժամանակն ու արժեքը: Բացի այդ որոշում է շինարարական վերահսկման որակի ինդեքսը, որը գնահատում է շինարարության նորմատիվ կարգավորման որակը: