Երկրում տնտեսական աճ ապահովելու համար իշխանության եւ ընդդիմության պատկերացումները տարբեր են: Այս մասին այսօր՝ նոյեմբերի 16-ին, ԱԺ-ում լրագրողների հետ զրույցում ասել է ֆինանսների նախարար Վարդան Արամյանը:
«Մեր թիմի եւ ընդդիմադիրների մոտեցման տարբերությունն այն է, թե ինչպես լուծել սոցիալական խնդիրները: Մեր մոտեցումն է՝ իրականում ինչ պետք է անենք, որպեսզի ապահովենք տնտեսական աճ: Եթե մենք չենք ունենում տնտեսական աճ, հետագայում պրոբլեմ է դառնում սոցիալական խնդիրները լուծելը, որովհետեւ չենք կարող ուղղակի մեր ազգաբնակչությանը խոստանալ, որ նվազագույն աշխատավարձը՝ որպես սոցիալական գործիք, բարձրացնում ենք, թոշակները բարձրացնում ենք, բայց ապագա տարիներին չունենանք բարձր տնտեսական աճ եւ հարկային եկամուտներ, ներողություն խնդրենք, ասենք՝ գիտեք, մենք չենք կարող հետագայում վճարել ձեր աշխատավարձերն ու թոշակները: Ես՝ որպես ֆինանսիստ, խիստ դատապարտում եմ այն մոտեցումը, որ մենք պերմանենտ բարձրացնենք թոշակներն ու աշխատավարձերը, սոցիալական բնույթի պարտավորությունները ֆինանսավորենք պարտքի հաշվին»,- ասաց Արամյանը:
Ֆինանսների նախարարն ասաց, որ վտանգավոր է անընդհատ բնակչությանը դրամական աջակցություն տալը, քանի որ կառավարության ռեսուրսները սահամանփակ են, իսկ բնակչության պահանջներն անընդհատ աճում են:
«Հետեւաբար, ո՞րն է ճիշտ քաղաքականությունը, պետք է օժանդակել մարդկանց, որպեսզի իրենք սեփական ուժերով իրենց սոցիալական վիճակը բարելավեն: Մենք կարծում ենք, որ այն ուղղությունը, որը որդեգրել ենք, ճիշտ է: Մենք չպետք է մեր ազգաբնակչությանը սովորեցնենք, որ նրանք սոցիալապես անապահովներ են, դա նաեւ հոգեբանական վատ վիճակ է ստեղծում երկրում»,- հավելեց նա:
